Bıyl maýsym aıynda Shymkent qalasynyń basty týrıstik nysanyna aınalady dep josparlanyp otyrǵan Sıtadel qamalynyń ashylýy josparlanýda. Osy oraıda Qazaqstannyń týrıstendirý kartasynyń TOP-50 nysanyna engizilgen «Eski qalashyq» kesheniniń sheber-jospary ázirlenbek. Bul týraly aqparattyq-kommýnıkasııa ortalyǵynda ótken baspasóz brıfınginde Shymkent qalalyq týrızm basqarmasy basshysynyń mindetin ýaqytsha atqarýshy Azamat Qalqabaev málimdedi.
Azamat Muratbekulynyń aıtýynsha, «Mádenı astana» aıasynda keletin qonaqtar men jalpy qalaǵa kelýshi týrısterge aqparattyq jáne konsýltasııalyq kómek kórsetý maqsatynda 20 naýryzǵa deıin qalada 5 týrıstik aqparattyq dúńgirshek ornalastyrylmaq.
Qazaq, orys jáne aǵylshyn tilderinde QR-tólqujattar ornalastyrylýda. Búgingi kúni 20 nysanǵa tólqujat qoıylsa, 20 naýryzǵa deıin qosymsha 10 nysanǵa ornalastyrylmaq. Bul QR-tólqujattarǵa aýdıogıdter jazylyp, IZI travel halyqaralyq týrıstik platformasymen ıntegrasııalanǵan.
Sonymen qatar, týrıstik nysandarǵa baǵyttaıtyn stellalar ázirlenýde. Jaqyn turǵan týrıstik nysan týraly aqparat berip, kartada onyń ornalasý núktesin kórsete alatyn stelalar qalanyń 30 núktesinde mamyr aıynyń basyna deıin qoıylady.
Buǵan qosa mamyr aıynda týrısterge aqparat beretin tablolarǵa qalanyń 3D týrıstik kartasy engiziledi.
– «Mádenı astana» aıasynda jáne qalaǵa keletin ózge de qonaqtardy Shymkent qalasynyń kórikti jerlerimen tanystyrý maqsatynda Týrızm basqarmasy tarapynan jarnamalyq-aqparattyq búktemeler, kartalar, sondaı-aq, «Shymkent – TMD elderiniń mádenı astanasy» is-sharasynyń seriktesi taqtaıshalary men jabystyrmalary ázirlenip, qaladaǵy qonaq úıler men áýejaıda ornalastyrylsa, arnaıy daıyndalǵan tósbelgiler qonaq úılerge taratyldy. 20 naýryzǵa deıin qosymsha tósbelgiler «SCAT» áýekompanııasynyń bortserikterine usynylady. Qazaqstandyq jáne sheteldik azamattarǵa Shymkent týraly keńinen aqparat taratý maqsatynda Instagram, facebook áleýmettik jelilerinde visit_shymkent_kz paraqshasy jumys istep tur. Búgingi tańda Týrızm basqarmasy tarapynan Sıtadel qamalynyń VR-rolıgi ázirlenýde, - dedi basqarma basshysynyń mindetin atqarýshy.
Sondaı-aq, «Rýhanı jańǵyrý» baǵdarlamasy sheńberinde 2020 jyldyń ekinshi jartysynda «Týrıstik klýb» ashý josparlanýda. Onyń basty maqsaty – týrızm mamandaryn jastaıynan daıyndaý, oqytý.
Sáýir aıynda «Arbat» jaıaý júrginshiler kóshesinde ekinshi «Qyzǵaldaq joly» merekelik festıvali ótetin bolady. Budan bólek, QR Prezıdentiniń 2019 jylǵy qyrkúıektegi halyqqa Joldaýynda aıtylǵandaı, etno-týrızmdi damytý, sondaı-aq, TMD elderinen keletin qonaqtarǵa ulttyq qolónerdi nasıhattaý maqsatynda sáýir aıynda «Etno Shymkent» qolónershiler festıvali, qazan aıynda «Dámdi Shymkent» gastronomııalyq festıvali ótedi.
Bul festıvaldi budan ári jyl saıynǵa dástúrge aınaldyrý josparda bar. Qalanyń týrıstik tartymdylyǵyn nasıhattaý, ishki jáne kirý týrızmin damytý maqsatynda bıyl sheteldik týroperatorlarǵa, BAQ ókilderi men blogerlerge aqparattyq týr uıymdastyrylmaq. Qazirgi tańda álemde qalyptasqan jaǵdaıǵa baılanysty atalǵan týrlardy 2020 jyldyń ekinshi jartysyna qaldyrý týraly sheshim qabyldanǵan.