Keńes barysynda Densaýlyq saqtaý mınıstri Eljan Birtanov Qasym-Jomart Toqaevqa Dúnıejúzilik densaýlyq saqtaý uıymy koronavırýsty pandemııa dep jarııalaǵannan keıingi álemdegi ahýal jaıynda baıandady. Sondaı-aq, mınıstr DDSU-nyń indetke qarsy kúreske qatysty usynystary, sondaı-aq, Qazaqstan azamattarynyń qaýipsizdigin qamtamasyz etýge baılanysty qabyldanyp jatqan sharalar týraly málimet berdi. Bul týraly Aqordanyń baspasóz qyzmeti habarlady.
Qazaqstan Prezıdenti Úkimetke jáne basqa memlekettik organdarǵa vırýstyń elimizge enýine jáne taralýyna jol bermeý sharalaryn qatańdatý jóninde birqatar naqty tapsyrma berdi. Atap aıtqanda, jappaı mádenı jáne sporttyq sharalar, konferensııalar men kórmeler ótkizýge ýaqytsha tyıym salynady. Halyq kóp shoǵyrlanatyn jerlerde, saýda ortalyqtary men bazarlarda, qoǵamdyq tamaqtaný oryndarynda, vokzaldar men áýejaılarda qatań sanıtarlyq rejım engiziledi. Mektepterdegi kóktemgi demalys 2020 jyldyń 16 naýryzynan bastalady. Joǵary oqý oryndary qashyqtan oqytý ádisine kóshiriledi. Halyqaralyq áýe tasymalyna qatysty da qosymsha shekteý sharalary qabyldanady.
Qasym-Jomart Toqaev halyqty azyq-túlikpen jáne eń qajetti taýarlarmen úzdiksiz qamtamasyz etý máselesin erekshe atap ótti. Prezıdent shekteý sharalarynan shaǵyn jáne orta bıznestiń zardap shekpeýi tıis ekenin aıtty.