ÝEFA chempıondar lıgasynyń shırek fınalyna berilgen joldamaǵa Madrıttiń «Atletıkosy» ıe boldy.
Alǵashqy oıyn nátıjesi ıspandyqtardyń paıdasyna jazylǵanyna qaramastan Lıverpýl jankúıerleri qarymta kezdesýde Dıego Semeone jigitteri «Barselonanyń» byltyrǵy kúıin keshedi dep jarysa jazdy.
Esterińizge sala keteıik, Lıverpýl byltyrǵy jyly Katalonııada 3:0 esebimen Barselonaǵa ese jibergenimen óz jerinde 4:0 esebimen jeńiske jetken edi. Sol jyly ÝEFA kýbogin ıelengen bolatyn. Sol úmittiń jeteginde júrgender Iýrgen Klopp Zıdannyń erligin qaıtalap, eki márte kári qurlyqtyń bas básekesinde jeńimpaz atanady dep kútti. Alaıda toptyq kezeńnen irkilmeı shyqqan mersısaıdtyqtardyń azýy Madrıttiń «Atletıkosyna» bata almady. Oıynnyń birinshi kezeńi aıaqtalar shaqta Djordjıno Veınaldým salǵan dop «Lıverpýldi» jigerlendirgendeı boldy. Degenmen oıynnyń negizgi kezeńi 1:0 esebimen aıaqtalyp, oıyn qosymsha 15 mınýttan turatyn 2 taımǵa jalǵasty. Qosymsha ýaqytta Fırmıno esep ashqanda aǵylshyn ertegisi jalǵasyn tapqandaı bolyp edi. Alaıda Lorenteniń qos goly men Morattanyń mergendigi aǵylshyndardy jarystan tys qaldyrdy. Qorytyndy esep 2:3. «Atletıko» jeńiske jetti.
Iýrgen Klop jigitteri buǵan muńaıa qoımas. Sebebi araǵa 30 jyl salyp, barlyq Lıverpýl jankúıerleriniń armany APL chempıony ataǵyn alýǵa az qaldy.
Bóltirik Nurtaı,
jýrnalıst