Babalarymyzdyń tasqa qashap jazǵan sózderiniń biri «Tizelini búktirdik, bastyny júgindirdik» edi. Osy jalǵyz aýyz sózden kók túrikterdiń rýhynyń bıiktigi kórinedi. Sol kók túrikter bizdiń babalarymyz emes pe? Árıne odan bergi myń jyldan asa ýaqytta kári tarıhtyń beti shym-shytyryq, ıyr-qıyr jazýlarǵa toldy.
Halqymyz da talaı taǵdyrly oqıǵalardy bastan keship, osy kúnge jetti. Tipti osy sońǵy bir ǵasyrdaǵy oqıǵalardyń ózin salystyra aıtqanda náýbettiń, aqtańdaqtardyń tarazysy aýyr eken. Sondyqtan eń aldymen elimizdiń táýelsizdigine shúkirshilik aıtamyz. Táýelsizdiktiń otyz jylynda talaı ister atqaryldy. Qazir endi qoǵamymyz ózgeristiń qarsańynda tur. Otyz jylda bir býyn ózgeredi. Sol ózgeris keldi. Biz qandaı da bir ózgeristerden jaqsylyq kútetin halyqpyz. О́zgerister jaqsy jaǵyna qaraı bolsa eken dep tileımin!
Dál qazirgi jaǵdaıda el basyna biraz aýyrtpalyqtar túsip tur. Mundaıda qazaq «kóppen kórgen uly toı» deıdi. Sabyrlylyq tanytyp, árqaısysymyz jaýapkershilik alsaq, bul náýbetten de qutylarmyz. Bastysy, elimiz aman bolyp, halqymyz jan tynyshtyǵyn qaıta tapsa eken. Tabıǵattyń jańaryp, túlep jatqan ádemi kezeńindegi eń uly mereke – Naýryz meıramymen birge árbir shańyraqqa qýanysh, baqyt, bereke bir-birin jeteleı kirsin! Ulys oń bolsyn, elimizdiń yrys-nesibesi mol bolsyn!
Ánes Saraı,
jazýshy, Memlekettik syılyqtyń laýreaty