Jambyl oblysynda koronavırýsty ınfeksııamen aýyrǵan naýqas tirkeldi. Koronavırýs ınfeksııasyn juqtyrǵan Shý aýdanynyń 29 jastaǵy turǵyny bolyp shyqty. Osy máselege baılanysty óńirlik kommýnıkasııalar qyzmetiniń alańynda shuǵyl brıfıng uıymdastyryldy. Jambyl oblystyq densaýlyq saqtaý basqarmasynyń basshysy Marat Jumanqulovtyń aıtýynsha, naýqas 23 naýryz kúni Qyrǵyz Respýblıkasynan kelgen.
Basqarma basshysy naýqastyń 24 naýryz kúni karantındik stasıonarǵa jatqyzylǵanyn habarlady. Naýqastyń dene qyzýy joq, jaǵdaıy birqalypty. Sondaı-aq, Marat Jumanqulov búginde naýqastyń mamandardyń baqylaýynda ekenin jetkizdi. Búgingi tańda naýqaspen 13 adamnyń baılanysta bolǵany anyqtalyp, olar karanıtnge oqshaýlanǵan. Olardyń mekenjaıy jáne ornalasqan jeri boıynsha dezınfeksııalyq óńdeý sharalary júrgizilgen.
Sonymen qatar, Jambyl oblysynyń ákimdigi elge kelgen soń atalǵan turǵynǵa zerthanalyq tekserýdiń júrgizilgenin, aldyn ala júrgizilgen taldaýlar qorytyndysy koronavırýstyq ınfeksııaǵa oń nátıje kórsetkenin málimdedi. Alynǵan bıomaterıaldar qosymsha zertteý úshin Almaty qalasyna jiberilgen. Sońǵy nátıjeler zerthanalyq zertteý qorytyndysy alynǵannan keıin jarııalanady.
Aıta keteıik, osy oraıda áleýmettik jeliler men messendjerlerde T.Rysqulov aýdany turǵynynyń koronavırýspen aýyrǵany jaıly aqparat taratylýda. Alaıda, mundaı habarlamalardyń shyndyqqa saı kelmeıtinin atap ótken jón.
Jambyl oblysy