Soltústik Qazaqstan polıseıleri jalǵan aqparattyń taralýyn boldyrmaý jumystaryn kúsheıte tústi. Tek ótken táýlik ishinde óńirde eldegi epıdemıologııalyq ahýalǵa qatysty jalǵan aqparat taratýdyń eki faktisi anyqtaldy.
Sonyń ishinde Taıynsha aýdanyndaǵy 39 jastaǵy aýzy jeńil bir áıel taǵy bir soltústikqazaqstandyqtyń dıagnozy rastalǵanyn aıtyp, habarlamany «WhatsApp» messendjeri arqyly quramynda 10-nan astam adamy bar «Dostar» tobyna jibergen. Toptaǵylar bul jalǵan aqparatty ary qaraı ózderiniń chattary boıynsha taratyp jibergen. Jalǵan habarlama bir kún ishinde júzdegen aýdan turǵynyna jetip, jergilikti turǵyndar arasynda úreı týdyrdy. Iske jedel kirisken polısııa ýákilderi taratýshyny jedel anyqtady. Qazir jalǵan aqparat taratý faktisi boıynsha QK 274-baby 4-bóligi boıynsha sotqa deıingi tergeý júrgizilýde. Áıel jerlesterinen keshirim suraǵan.
Taǵy bir arandatýshy Petropavlda koronavırýspen aýyrǵan eki adam týraly jáne aldaǵy ýaqytta oblys ortalyǵynyń karantınge jabylatyny jóninde otbasylyq chatqa habarlama jibergen. «Tóngen qaýipti» top qatysýshylary tanystaryna jiberip, taratyp jibergen. Sondaı-aq, Mamlıýt aýdanynda polıseıler jergilikti pablıkterge monıtorıng júrgizý kezinde aýdan ortalyǵynda anyqtalǵan indet týraly jalǵan kommentarıı ornalastyrǵan adamdy anyqtady.
Osy adamdarǵa qarsy qazir tıisti sharalar qabyldanýda. Qylmystyq kodekstiń 274-babynda jalǵan aqparat taratqany úshin bas bostandyǵynan aıyrýǵa deıin jaýapkershilik aıtylǵan. Eger bul Tótenshe jaǵdaı kezinde oryn alsa, onda úsh jyldan jeti jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý túrindegi jaza qoldanylady.
«Halyq arasynda dúrbeleń týǵyzatyn jalǵan aqparattyń taralýyn anyqtaý jáne jolyn kesý maqsatynda maqsatty jumystar júrgizilýde. Osyndaı faktiler áleýmettik jeliler men messendjerlerge monıtorıng júrgizý barysynda anyqtaldy», - deıdi SQO PD basqarmasynyń bastyǵy Rýslan Muhambetjanov.
Soltústik Qazaqstan oblysy