Tuńǵysh Prezıdent - Elbasynyń baspasóz hatshysy Aıdos Úkibaı qazir Elbasy eldegi jaǵdaıdy baqylap otyrǵanyn aıtty.
«Búgingi kúni memleket azamattarymyzdyń qaýipsizdigin qamtamasyz etý úshin mańyzdy sharalar qabyldap jatyr. Osy rette, adamdar eldiń bolashaǵy úshin jaýapkershilik olardyń mamandardyń nusqaýlaryn qalaı oryndaıtynyna baılanysty ekenin túsinýi kerek. Adamdardyń óz qaýipsizdigi men jaqyndarynyń amandyǵyna baıyppen qaraıtyny qýantady», dedi Aıdos Úkibaı.
Sondaı-aq ol Elbasynyń qazirgi ýaqytta nemen aınalysyp jatqanyn aıtty.
«Elbasy Nursultan Nazarbaev eldegi jaǵdaıdy jiti baqylap, Qaýipsizdik Keńesiniń hatshysynan mańyzdy aqparattardy alyp otyrady. Sondaı-aq mańyzdy saıası sheshimderdi talqylaýǵa qatysyp, el Prezıdentine qoldaý kórsetýde. Sonymen qatar ol turǵyndarǵa kómek kórsetý jumystarymen aınalysyp jatqan Nur Otan partııasynyń qyzmetin úılestirip otyr», dedi ol.
Onyń aıtýynsha, qazir Tuńǵysh Prezıdenttiń bastamasymen qurylǵan «Birgemiz» qoǵamdyq qorynyń jumysy erekshe baqylaýda.
«Budan bólek, Elbasy Álemdik ekonomıka jáne saıasat ınstıtýtyna álemdegi jaǵdaıdy jáne Qazaqstanǵa jahandyq trendterdiń yqtımaldy teris yqpalyn zertteý boıynsha taldaý jumystaryn kúsheıtýdi tapsyrdy. Bul derekter sáıkes memlekettik qurylymǵa jiberiledi. Búginde barlyq kúsh halyqtyń qaýipsizdigi men ony qorǵaýdy qamtamasyz etýge jumsalýda. Biz birliktiń arqasynda kóptegen synaqtan óttik. Bul qıyndyqtardan da basymyzdy joǵary kóterip eńseretinimizge senimdimin», dedi Úkibaı.