28 naýryz kúni Jambyl oblysynyń ákimi Berdibek Saparbaev Qordaı aýdanyndaǵy tártipsizdikterge qatysy bar degen kúdikpen ustalǵan azamattardyń týystarymen kezdesti. Bul týraly ákimdiktiń baspasóz qyzmeti habarlady.
Sortóbe aýylynda ótken kezdesýge oblys prokýrory Nurǵalym Ábdirov, UQKD bastyǵy Marat Irmenov, polısııa departamentiniń basshysy Janat Súleımenov qatysty.
Berdibek Saparbaev ustalǵandardyń týystarynyń ótinishterine qulaq túrip, olardy quqyq qorǵaý organdary mindetti túrde nazarǵa alatynyn jetkizdi. Aımaq basshysy barlyǵy zań aıasynda sheshilýi tıis ekendigin atap ótti.
«Oryn alǵan qaıǵyly oqıǵadan 11 adam ajal qushyp, eki júzge jýyq adam jaraqat aldy. Azamattarymyzdyń múlikteri zaqymdaldy. Eki aı boıy quqyq qorǵaý organdary tergeý amaldaryn júrgizdi. Arnaıy operasııa barysynda kúdiktiler ustaldy. Eger bireý zańdy buzsa jáne onyń kinási dáleldense, ol tıisti jazasyn alýy tıis. Barlyǵy zań aıasynda bolýy kerek. Bul másele boıynsha túpkilikti sheshimdi sot qabyldaıtyn bolady», - dep atap ótti B. Saparbaev.
Aımaq basshysy jınalǵandardy tártip pen zańdylyqty saqtaýǵa shaqyryp, túrli arandatýlarǵa jol bermeýlerin surady.