Keshe Prezıdent janyndaǵy Ortalyq kommýnıkasııalar qyzmetinde onlaın-brıfıng ótkizgen Densaýlyq saqtaý mınıstri Eljan Birtanov elimizde koronavırýs juqtyrǵan naýqastardyń jaǵdaıy týraly aıtty.
«Qazirgi ýaqytta jalpy koronavırýs juqtyrǵan 302 jaǵdaı tirkeldi. Naqtyraq aıtsaq, Nur-Sultan qalasynda – 169, Almatyda – 73, Atyraý oblysynda –12, Qaraǵandy qalasynda – 13, Almaty oblysynda – 8, Aqmola oblysynda – 8, Jambyl oblysynda – 3, Shymkent qalasynda – 2, Shyǵys Qazaqstan oblysynda – 2, Qyzylorda oblysynda – 5, Batys Qazaqstan oblysynda – 2, Aqtaý oblysynda – 2, Soltústik Qazaqstan oblysynda – 1, Pavlodar oblysynda – 1, Mańǵystaý oblysynda 1 naýqas tirkeldi. 302 naýqastyń ekeýi – 14 jasqa deıingi bala. Naýqastardyń arasynda 79-y basqa memleketterden kelgen azamattar, 97-si basqa naýqastarmen qarym-qatynasta bolǵandar, al 131-i aýrýdy qalaı juqtyrǵany belgisiz», degen E.Birtanov osyǵan baılanysty mınıstrlik tarapynan usynystar berilip, Memlekettik komıssııa barlyq óńirde karantın sharalaryn kúsheıtý boıynsha tapsyrma bergenin atap ótti.
Mınıstrdiń aıtýynsha, koronavırýs juqtyrǵan naýqastardyń ishinde segiziniń jaǵdaıy nashar. Tórteýi jasandy jeldetkishte, jaǵdaılary kúndelikti mamandarmen talqylanyp, baqylaýda bolady. 30 naýqastyń jaǵdaıy ortasha, jeńil nemese sımptomsyz jaǵdaıdaǵy 244 naýqas bar. Nur-Sultan qalasynda – 14, Almaty qalasynda 7 naýqas jazylyp shyqty.