Saýda-sattyq qorytyndysy boıynsha 13-27 naýryz aralyǵynda teńgeniń naryqtyq baǵamy 10%-ǵa (405,46-dan) álsirep, bir AQSh dollary úshin 445,84 teńge deńgeıinde qalyptasty dep habarlaıdy Qarjy naryǵyn retteý jáne damytý agenttigi.
Syrtqy valıýta naryǵynda 2020 jylǵy 13-27 naýryz aralyǵyndaǵy kezeńde birqatar mańyzdy oqıǵa boldy. Aldymen AQSh-tyń Federaldy rezervtik júıesi negizgi paıyzdyq mólsherlemeni 0-0,25%-ǵa deıin tómendetti. Sondaı-aq koronavırýstyń áserinen qarjylyq keleńsizdikke qarsy birqatar baǵdarlamany iske qosy. AQSh-tyń Federaldy rezervtik júıesi, sonymen qatar, álemniń 9 jetekshi ortalyq bankimen svop jelileri arqyly «kók qaǵazdyń» qunyn arttyrý boıynsha kelisilgen sharalar týraly habarlady. AQSh Kongresi ekonomıkany ustap turý úshin 2 trln dollar bólýge kelisim berdi. О́tken aptanyń ortasynan bastap damýshy elderdiń valıýtalary álemdik ekonomıkany qoldaý jónindegi aýqymdy sharalar aıasynda turaqtaný belgilerin kórsetýde.
Damýshy elder valıýtalarynyń AQSh dollaryna qatysty baǵamdarynyń serpini bylaı qalyptasty:
Úndi rýpııasy 1,3%-ǵa (73,91-den 74,85-ke deıin) álsiredi. Úndistannyń rezervtik banki jalpy somasy 50 mlrd dollardy quraıtyn ótimdilikti qamtamasyz etý sharalary týraly jarııalap, negizgi mólsherlemeni 5,15%-dan 4,4%-ǵa deıin tómendetti.
Túrik lırasy 1,9%-ǵa (6,33-ten 6,45-ke deıin) álsiredi. Prezıdent koronavırýstyń saldarymen kúresý sharalaryn jarııalady, ekonomıkany yntalandyrý kólemi 15,4 mlrd dollardy qurady.
Brazılııa realy ortalyq banktiń 3,75%-ǵa deıin tómendetý týraly sheshiminiń aıasynda 5,4%-ǵa (4,84-ten 5,1-ge deıin) álsiredi.
Meksıka pesosy S&P agenttiginiń táýelsiz reıtıngti BBB deńgeıine deıin tómendetý týraly sheshimi aıasynda 6,5%-ǵa (21,92-den 23,34-ke deıin) álsiredi.
Reseı rýbli munaı naryǵyndaǵy teris dınamıkanyń jáne ınvestorlardyń táýekel deńgeıiniń nasharlaýy saldarynan 8,9%-ǵa (72,44-ten 78,92-ge deıin) álsiredi.
Indonezııa rýpııasy mólsherlemeni 4, 5%-ǵa deıin tómendetkennen keıin 9,4%-ǵa (14 778-den 16 170-ke deıin) álsiredi, ekonomıkalyq ósý boljamy 4,2-4,6% deıin túzetildi (5-5,4% - aldyńǵy boljam boıynsha).