Ádette elordanyń tirshiligi kúni-túni bir damyldaǵan emes. Qaı salanyń da qazandyǵy úzdiksiz qaınap jatatyn. Al qazir bas shahardyń tynysy burynǵydan ózgerek. Qaptaǵan kóliktiń shýy azaıyp, tirlik saıabyrsyǵan. Qalǵymaıtyn qalanyń turǵyndary da jym-jyrt...Karantın óıtkeni. Qalanyń qazirgi damyldaǵan kezeńi ádettegi kúndegi túngi tynyshtyqpen para-par keledi eken.
Qazirgi karantın jaǵdaıyna baılanysty elimizdiń bas qalasynda kólik qozǵalysy kúrt azaıyp, turǵyndardyń ózin-ózi oqshaýlaýy 4,25 ball deńgeıine jetken. Bul týraly Nursultan qalasy ákiminiń orynbasary Málıka Bekturova Telegramm-kanalynda habarlady.
Jol qozǵalysyn baqylaıtyn «Sergek» trafıginiń ındeksi boıynsha 2020 jyldyń 12 naýryzynan bastap, elorda joldarynda kólik sany 71 paıyzǵa azaıǵan. Mamandar «Sergek» júıesiniń karantınge deıingi jáne tótenshe jaǵdaı jarııalanyp, karantın engizilgennen keıingi derekterdi salystyrǵan. Sonda buryn ádettegi qala tirshiligindegi kúndizgi qozǵalys 0,5 balǵa teń bolsa, elordanyń túngi ýaqyttaǵy kórsetkishi 4.6 ball bolǵan.
Al qazirgi karantın kezeńindegi qalalyq qyzmetterdiń, atap aıtqanda, polısııanyń, jedel járdemniń, as-sý tasıtyn qyzmetterdiń qozǵalysyn qosa eseptegende, eń joǵary ball – 4,5-ke ǵana jetken, ıaǵnı ádettegi túngi kezdegi tynyshtyqpen para-par bolǵan. Bul degenińiz bas shahar turǵyndarynyń ózin-ózi oqshaýlaý tártibin aıtarlyqtaı saqtap jatqanyn bildiredi, deıdi ákim orynbasary.
Qymbat TOQTAMURAT