О́tken jyly 3 shilde kúni Mońǵol eliniń Mádenıet mınıstri qala ortalyǵyndaǵy burynǵy «Tabıǵat hám tarıh» mýzeıi qulatalyp, onyń ornyna 9 qabattan turatyn álemge áıgili «Shyńǵys han» mýzeıin salý jaıly shyǵarǵan úkimet sheshimin jarııalaǵan bolatyn.
Mýzeıdiń jalpy aýmaǵy 15 myń sharty metrdi qurasa, onyń ekspozııasııasy Mońǵol ústirtinde ómir súrgen erte dáýirdegi saq, ǵun taıpalary, birinshi orta ǵasyrdaǵy kók túrki qaǵanaty jaıly derek beretin artefaktylar, arheologııalyq qazba muralary, ár dáýirge tán qoldanbaly óner týyndylarynan bastap, Shyńǵys han dáýirin qamtymaq. Mýzeıdiń qor jıyntyǵy jaıly ázirge málimet joq, dese de burynǵy qulaǵan mýzeıdiń 12 myń jádigeri osynda aýysatyn kórinedi. Bular áınektiń astynda jyltyrap jatpaıdy kópshilikke vırtýaldy tásilmen tanystyrylady. Bul is mýzeı ishiniń 60 paıyz aýmaǵyna josparlanyp otyr eken.
Búgin eldiń Bas mınıstri Ý.Húrelsúhtiń qatysýymen atalmysh mádenı oshaqtyń alǵashqy qazyǵy qaǵyldy. Úkimet basynyń aıtýyna qaraǵanda, mýzeı mońǵol halqynyń maqtanyshyna aınalýy tıis ári uly qaǵan jaıly álem jurtshylyǵyna ámbebap túsinik týǵyza alatyndaı bolý kerek. Tipti Reseı Federasııasy Ermıtajda turǵan «Shyńǵys hannyń tasyn» osynda bermekshi eken. Budan basqa Shyńǵys tuqymynan taraıtyn aty málim 37 hanǵa arnalǵan kórme-keńse bolady. Mýzeı salýǵa ketetin shyǵyn – 53 mıllıard tógróg.
«Qudaı buıyrsa 2021 jyldyń aıaǵyna deıin alyp mýzeı paıdalanýǵa berilmek» deıdi mońǵol baspasózi.