Yqylym zamannan beri adamzat balasy neni kórmedi. Adamnyń qolymen jasalǵany bar, tótennen kelgen tylsym qaýip-qater bar, jetip-artylady jáne osynyń qaı-qaısysy da kezegimen aınalyp soǵyp otyrady.
Qalaı bolǵanda da, adamzat joǵalyp ketken joq, aman qaldy. Jantúrshigerlik sumdyq surapyl úreıge, tiktep kelgen ajalǵa tek adam balasyna tán kúreskerlik rýhynyń sabyr, tózim, erik-jiger, paıym-parasaty sııaqty qudiretti qundylyqtarymen qarsy turdy. Bizdiń ata-babamyzdan «Budan da jaman kúnimizde toıǵa barǵanbyz» degen sóz qalǵan. Munyń astarynda aspan aınalyp jerge tússe de ómir súrýdi toqtata almaımyz, qasıetti Jer-anany tastap kete almaımyz degen ustanym jatyr. Bul búgingi tańda búkil álemge jaıylyp bara jatqan koronavırýs kezinde kúndelikti kúnkóris saltymyzdyń, maqsat-múddemizdiń barlyǵynan ústem bolýy tıis. Prezıdentimiz Qasym-Jomart Toqaevtyń elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty málimdemesindegi: «Qazir búkil álem buryn-sońdy bolmaǵan kúrdeli jaǵdaımen betpe-bet kelip otyr... Koronavırýs – batpandap kirip, mysqaldap shyǵatyn qaýipti dert», degen eskertýin erteli-kesh esten shyǵarmaýymyz kerek. El-jurtqa qaýip tónip kele jatqanda, sol eń basty qazynamyzdyń tutastaı amandyǵy úshin tańdy atyryp, kúndi batyryp, kún keshe almaıtyn bolsaq, myna jaryq dúnıede barar jer, basar taýymyz qalmaı qalady. Másele osylaı qoıylyp otyrǵan syn saǵatta el Prezıdenti Qasym-Jomart Toqaev pen Úkimet tarapynan júzege asyp jatqan shuǵyl sharalar – bilgenge dál búgin súıener jalǵyz senerimiz. Bizge qalatyny, aýa jaıylatyn alyp-qashpa sózderdi aınalyp ótetin tártipti Táńirideı kóretin, kisilikti kimge de teń kórsetetin tektilikpen, úmit oty teń janatyn, tilek-nıeti teń túsip otyratyn abyroı. Bılik pen buqaranyń bir mezgilde bir-birin birdeı qoldap otyratyn abyroıy. Eger biz myna qıyndyqtardy eńserip, damýdyń jańa kezeńine aıaq basa beremiz desek, osyny qaperden shyǵarmaıyq.
Reti kelgende aıta ketpeı bolmas. Úkimettiń qarjylaı kómegin aıtqanda, keıbireýdiń kórpeni ózine qaraı tartqyshtaýy baıqalady. Anany qoıa turý kerek, mynany toqtatý kerek. Bizge berilsin, áýelisi osynda bolmasa, memlekettiń, halyqtyń kúni shyǵyp, aıy batpaıtyn sııaqty. El basyna kún týǵan sátte bılik sen kásipkersiń, jumysshysyń, anaýsyń-mynaýsyń dep alalap, alasapyran jasaı almaıdy. «О́zim degende ógiz qara kúshim bar» deý, birtutastyqqa syzat túsiretin, ótken shaq. О́nip-ósetin órkenıetke jat qylyq. Qoǵamdy birer kásip ıeleri, meıli olardyń múmkindikteri teńdeı tasyp jatsa da, quraı almaıdy. Memlekettiń kóshi halyqtyń birtutastyǵymen ǵana jasalady.
Nesipbek DÁÝTAIULY,
jazýshy, Qazaqstannyń eńbek sińirgen qaıratkeri