Búgin, ıaǵnı 6 sáýir kúni Qazaqstan mektepterinde tórtinshi toqsan bastaldy. Alaıda eldegi tótenshe jaǵdaıǵa baıanysty oqýshylar qashyqtan oqýǵa kóshýge májbúr.
Nur-Sultanda karantın kezinde stýdentter men oqytýshylardy qashyqtan oqýǵa kóshirý boıynsha kóptegen jumystar atqaryldy. Barlyq muǵalimder men halyqtyń áleýmettik osal toptaryna jatatyn balalar ınternetpen jáne kompıýtermen, flesh-kartalarmen qamtamasyz etildi, dep habarlaıdy Nur-Sultan qalasy ákimdiginiń resmı saıty. Oqý sharalary ınternetti qajet etpeıtin tetikter arqyly da uıymdastyrylady. Atap aıtqanda, radıo, telearnalar men poshta arqyly júzege asady. Sabaqtar «Elarna» jáne «Balapan» arnalarynda orys jáne qazaq tilderinde kórsetiledi. Alaıda keıbir mektepter oqýshylarmen baılanysýdyń basqa da múmkindikterin qarastyra alady.
«Bul elimiz úshin alǵashqy tájirıbe. Bizdiń mektep úshin Google qosymshalaryn tańdadyq. Bul – muǵalimdermen jáne stýdenttermen baılanys ornatýǵa arnalǵan Google Meet jáne Google Drive. Onda biz qajetti materıaldardy, kesteler men siltemelerdi júkteımiz. Google Drive-tyń artyqshylyǵy – ata-analar men oqýshylar barlyq aqparatty bir ýaqytta alady. Ata-analar balanyń qandaı tapsyrma alatynyn qadaǵalap, ony baqylaı alady. Úshinshi platforma – Kundelik qosymshasy. Osy qosymshanyń kómegimen balalar muǵalimmen keri baılanys jasaı alady», - dedi Nur-Sultan qalasyndaǵy № 54 mektep dırektory Shákárim Seısenbaı.
Mektepterde qosymshalardy paıdalaný úshin muǵalimder men oqýshylarǵa, ata-analarǵa arnalǵan nusqaýlyqtar ázirlengen. Aıta keteıik, qalada 117 jalpy bilim beretin mektep bar, onda barlyǵy 182 myńnan asa oqýshy oqıdy.