Bul toqsan – burynǵy toqsannan ózgerek. Iá, keshe, ıaǵnı 6 sáýirden bastap mektep oqýshylary IV toqsandy bastady. Tótenshe jaǵdaıdaǵy toqsannyń burynǵydan bólekteý bolyp turǵany – balalar qashyqtan bilim alýǵa kóshti. Jańa formattaǵy oqýdyń bastamasy qalaı? Bul týraly Bilim jáne ǵylym mınıstri Ashat Aımaǵambetov Ortalyq kommýnıkasııalar qyzmetinde ótken brıfınte baıandady.
Mınıstr áriptesteriniń qysqa merzimde úlken is atqaryp, jańa formatqa beıimdelip, negizgi daıyndyqty júrgizgenin atap ótti.
– Tótenshe jaǵdaıdaǵy jańa toqsan – bárimiz úshin úlken emtıhan, sonymen qatar tamasha múmkindik. Osy tájirıbeden keıin elimizdiń bilim berý salasy ózgeretini aıdan anyq. Alǵashqy kúnniń basty nátıjelerine toqtalsaq, búginde 3,2 mln oqýshy qashyqtan bilim alýdy bastady. 2,4 mln oqýshy ınternet arqyly qashyqtan sabaq oqydy. Kundelik.kz júıesin 2,2 mln bilim alýshy paıdalandy. Daryn.online platformasyna 300 myńnan asa oqýshy tirkelgen. Bul platformada daıyn vıdeo sabaqtardy qarap, sol sabaq boıynsha berilgen tapsyrmalardy oryndaýǵa bolady. Al BilimLand bilim berý platformasyn qashyqtan oqýdyń birinshi kúni 400 myńǵa jýyq bilim alýshy qoldandy. Telearnalardaǵy sabaqtardy tyńdaǵan soń, úsh deńgeıli tapsyrmalardy oryndap, forýmdar arqyly muǵalimmen túsinbegen tustaryn talqylaı alady. Bir ǵana Kundelik.kz júıesinde 32 mln ret seksııa bolypty, ıaǵnı osynsha ret saıtqa kirý áreketi tirkeldi. Bul – rekord. Biz Egov portalyndaǵy 15 mln seksııany kóp degenbiz. Sonymen salystyrǵanda bilim berý salasynyń bir ǵana júıesindegi seksııanyń eki ese kóp ekenin eskersek, jumystyń joǵary qarqynmen bastalǵanyn bilýge bolady, – dedi vedomstvo basshysy.
Onyń aıtýynsha, ınternetke qatysty problemalar, tehnıkalyq aqaýlar bar, ony jasyrýǵa bolmaıdy. Tehnıka, ınternetke jaýapty mınıstrlikter men mamandardyń nátıjeli jáne belsendi jumysynyń nátıjesinde mundaı máseleler ýaqytynda sheshilip jatyr.
Qashyqtan oqytýdyń bir tetigi – teledıdar arqyly bilim berý. Osy oraıda «Balapan», «El arna» telearnalary keste boıynsha telesabaqtar berýdi bastady. Bul jóninde A.Aımaǵambetov:
– Tele-sabaqtar oqý josparyna saı ázirlengen. Biz júrgizgen saýaldamanyń qorytyndysynda ınternetpen jumys istegen balalardyń ózi qosymsha tele-sabaqtardy qaraǵanyn bildik. Eń bastysy, biz kóbirek ýaıymdaǵan aýyldyq, shalǵaı jerlerdegi oqýshylar telesabaqtar arqyly ýaqtyly bilim alyp otyr. Túske taıaý ózim arnaıy birneshe aýyldyń muǵalimderimen, ata-analarymen habarlastym. Sonda olar telearnadaǵy sabaqtarǵa qatysty jaǵymdy oı-pikirlerin jetkizdi. Bul biz úshin asa mańyzdy, – dedi. Mınıstrdiń málimdeýinshe, barlyq bilim basqarlamary men bilim bólimderine, sonymen qatar muǵalimderge qashyqtan oqytýdyń usynymy joldanǵan.
Onda muǵalim qashyqtan oqytý prosesin uıymdastyrý barlyq mektep úshin qatań bekitilgen dástúrli keste boıynsha emes, ıkemdi, jeke kestege saı ótetini; bir pán boıynsha sabaqtyń uzaqtyǵy kórsetilmeıtini, bul bilim alýshylardyń oqý maqsattaryna qol jetkizýine jáne tapsyrmalardy oryndaýyna baılanysty bolatyny; telesabaqtardy kez kelgen yńǵaıly ýaqytta BilimLand platformasynan, youtube arnalarynan qaıtadan kóre alatyny; ár kúnge oqý tapsyrmasyn alý ádisteri men quraldary jáne olardy bilim alýshyǵa yńǵaıly ýaqytta oryndaý; elektrondy kúndelikke sabaqqa qatysý týraly aqparat engizilmeıtini, qashyqtan ótkiziletin sabaqtar ata-analardyń qoldaýyn jáne qatysýyn, bilim alýshynyń tapsyrmalardy ózdiginen oryndaýyn talap etetini týraly ata-analardy habardar etý kerektigi jazylǵan.
Vedomstvo basshysy osyǵan qosa ata-analardan bilim alýshylardyń tapsyrmalardy oryndaýyn foto, beıne arqyly rastaýyn talap etýge bolmaıtynyn, oqý tapsyrmalarynyń kólemi Bilim jáne ǵylym mınıstrligi usynǵan kólemnen aspaýy tıis ekenin jáne muǵalimderdiń jýrnal toltyrýdan ózge qosymsha esep berýge mindettelmeıtinin eskertti.