Qasym-Jomart Toqaev «Continental Logistics» JShS-nyń kólik-logıstıka ortalyǵyna baryp, 6 myń tonnadan astam azyq-túlik taýarlary saqtalǵan qoımany aralap kórdi. Jalpy Nur-Sultan qalasynyń aýmaǵynda kólemi 222 myń sharshy metr bolatyn 7 logıstıkalyq keshen jáne 37 myń tonna azyq-túlik ónimderin saqtaýǵa arnalǵan 7 kókónis qoımasy bar. Bul týraly Aqordanyń baspasóz qyzmeti habarlady.
Prezıdentke elorda men óńirlerdi azyq-túlikpen qamtamasyz etý máselesi jaıynda baıandaldy. Saýda jáne ıntegrasııa mınıstri Baqyt Sultanov Memleket basshysyna áleýmettik mańyzy bar azyq-túlik taýarlarynyń baǵasyn retteý maqsatynda qabyldaǵan sharalar týraly málimet berdi. Aýyl sharýashylyǵy mınıstri Saparhan Omarov Qazaqstan Prezıdentine kókónis ónimderin, bıdaı men un jetkizý jaıyn baıandady. Nur-Sultan qalasynyń ákimi Altaı Kólginov Memleket basshysyna elordanyń qazirgi ahýaly jóninde esep berdi.Qasym-Jomart Toqaev Úkimetke oblystar men qalalardyń ákimderimen birlesip, azyq-túlik taýarlary baǵasynyń qymbattaýyna jol bermeýdi, alyp-satý faktileriniń aldyn alýdy, sondaı-aq, turaqtandyrý qoryn tolyqtyrýdy tapsyrdy.- Bul - óte mańyzdy jumys. Halqymyzdy azyq-túlikpen qamtamasyz etý máselesi - basty mindet. Osy baǵytta durys jumys júrgizý kerek, - dedi Memleket basshysy.
Qasym-Jomart Toqaev qazirgideı Tótenshe jaǵdaı kezinde azyq-túlik taýarlaryn turaqty jetkizý baǵytyndaǵy jumystardy júıeli júrgizýge erekshe mán beriletinin jetkizdi.Prezıdenttiń aıtýynsha, Ortalyq Azııa memleketteriniń úkimetteri járdem suraǵan jaǵdaıda, Qazaqstan atalǵan elderge yntymaqtastyqtyń belgisi retinde tıisti kómek kórsetýge ázir.- Ortalyq Azııadaǵy kórshiles memleketterge gýmanıtarlyq kómek kórsetýge daıynbyz. Qazaqstan - aımaqtaǵy kóshbasshy el. Sondyqtan osyndaı qıyn-qystaý kezeńde kómekke zárý elderge qol ushyn sozý mindetimiz, - dedi Qasym-Jomart Toqaev.