Elbasy «Egemen Qazaqstan» gazetiniń búgingi sanynda jarııalanǵan maqalasynda Úkimet pen jergilikti atqarý organdaryna ýaqytsha qıyndyqtan shyǵýǵa barlyq kúsh-qýatty jumyldyrý qajet ekenin basa aıtty.
«Qazirgi Qazaqstandy Keńes Odaǵy ydyraǵan ótken ǵasyrdyń 90-jyldaryndaǵy Qazaqstanmen salystyrýǵa bolmaıdy. Bizde osyndaı qıyndyq týǵanda eshkimge alaqan jaımaý úshin, urpaq qamy, el bolashaǵy úshin jınaqtalǵan Ulttyq qor men altyn-valıýta qorynda 90 mıllıard AQSh dollarynan astam qarajat bar. Retimen, únemdi paıdalanar bolsaq, ol búgin basymyzǵa túsken taǵdyr men tarıh synynan eńsemizdi tik ustap ótýimizge mol múmkindik beredi» delingen maqalada.
N.Nazarbaev Ulttyq qordy saqtap qalý arqyly halyqqa áleýmettik kómek berý múmkindigi týyp otyrǵanyn basa aıtty.
«El Prezıdenti Qasym-Jomart Kemeluly Toqaev halyqqa arnaǵan taıaýdaǵy úndeýinde barlyq áleýmettik toptarǵa, kásipkerlerge, aýyl sharýashylyǵy salasyna kórsetiletin alýan túrli kómek týraly jan-jaqty maǵlumat berdi. Eger Qazaqstannyń ulttyq ekonomıkadaǵy qol jetkizgen tabystary men joǵaryda atalǵan qor qurylmasa, munyń biri de bolmas edi. Kezinde sonyń bárin taratyp bereıik degender de bolǵan, biraq ómir biz qabyldaǵan sheshimniń durys bolǵanyn kórsetti»,- dedi elimizdiń tuńǵysh Prezıdenti.
Elbasy: «Endi Úkimet pen jergilikti atqarý organdary sony únemdi túrde, ret-retimen oryndaýǵa kirisýi kerek. Ár mınıstr, árbir oblys, qala jáne aýdan basshylary júıemen, tártippen, úılesimmen, naqty josparmen, nyq senimmen áreket etip, ýaqytsha qıyndyqtan shyǵýǵa barlyq kúsh-qýatty jumyldyrýy qajet. «Nur Otan» partııasynyń músheleri de osy bir saýapty istiń aldyńǵy qatarynan tabylýǵa tıis» ekenin qosa aıtty.