О́ńirlik kommýnıkasııalar qyzmetiniń habarlaýynsha, Atyraý oblysy turǵyndarynyń kópshiligin tóleý merzimi shegerilgen nesıeler, salyqtan bosatý, sondaı-aq, áleýmettik tólemderge qatysty máseleler tolǵandyrady.
Dıspetcherlik ortalyqqa 2 aptada turǵyndardan 10 myńǵa jýyq ótinish túsken. Onyń ishinde baılanys ortalyǵyna 7 myńǵa jýyq jýyq saýal, 87750006109 WhatsApp nómirine 2 myńdaı habarlama, 109 telefon nómirine shamamen 1 myń qońyraý qabyldanǵan.
«Halyqtyń jıi qoıatyn suraqtarynyń biri – nesıe tólemderin keıinge qaldyrý, salyqtan bosatý, áleýmettik tólemderdi tóleý. Osyǵan oraı turǵyndardan túsken 3700 saýal óńdeldi.
Ekinshisi – koronavırýstyń alǵashqy belgilerin túsindirýge qatysty. Aldyn alý, tótenshe jaǵdaı kezindegi karantın jáne shekteý sharalary jóninde 860 saýal tústi.
Úshinshisi – áýe jáne temirjol qatynasy, jolaýshylar tasymaly máselesi. Turǵyndar osyǵan oraı 840 suraq qoıdy» -dep habarlady óńirlik kommýnıkasııalar qyzmeti.
Jumasat ǴAZIZ