Karantın kezinde balalardyń rýhanı bilimin arttyrý úshin qazaqstandyq teatrlar arnaıy onlaın jobany iske qosqan edi. Elorda teatrlary da bul jobaǵa belsene qatysyp, kishkentaı kórermenderge úzdik týyndylaryn usynyp jatyr.
Nur-Sultandaǵy M.Gorkıı atyndaǵy orys drama teatry ár sársenbi, juma kúnderi saǵat 11.00-de GORKY FM radıostansasy arqyly álemniń jaýhary sanalatyn kórkem týyndylar jóninde syr shertýdi ádetke aınaldyrǵan. Radıohabar barysynda teatrdyń talantty akterleri mektep baǵdarlamasyna engen kórkem shyǵarmalardan úzindi oqıdy.
Teatr ujymy 10 sáýir kúni, saǵat 10.00-de Hans Krıstıan Andersenniń «Qar patshaıymy» ertegisin sahnalamaq. Kishkentaı kórermender bul ertegini tikeleı kórsetilim arqyly YouTube kanalynan tamashalaı alady.
Sondaı-aq, óner ordasynyń mektep oqýshylaryna arnalǵan taǵy bir tartýy – ádebıet páninen arnaıy kýrstar legi. 11 sáýirden bastap, apta saıyn YouTube kanalynan kórsetiletin onlaın-jobany respýblıkalyq fızıka-matematıka mektebiniń orys tili jáne ádebıeti pániniń muǵalimi Laýra Ilıasova júrgizedi. Alǵashqy onlaın-sabaq A.Pýshkınniń povesine arnalatyn bolady.
Qymbat TOQTAMURAT