Qazaqstannyń Tuńǵysh Prezıdenti – Elbasy Nursultan Nazarbaevtyń «Birlese bilgen el bárin jeńedi» atty maqalasy osynaý qıyn kezeńde halqymyzǵa qoldaý boldy dep bilemin. Elbasy otandastarymyzdy birlikke, sabyrǵa shaqyra otyryp, úreıge boı aldyrmaýǵa, qaıǵyǵa salynbaýǵa úndedi.
«Árıne qalyptasyp otyrǵan jaǵdaı ońaı emes. Bul – búkil álem memleketterine túsken zor aýyrtpashylyq. Biz ony osyndaı syn saǵatta septigin tıgizetin halqymyzdyń tózimdiligi, erik-jigeri jáne ózine degen zor senimi arqasynda mindetti túrde jeńip shyǵamyz. Ol úshin bizge qajetti nárse – qarjy-qarajat, materıaldyq resýrs, tehnıka, azyq-túlik – bári bar. Alańdaıtyn, abyrjıtyn esh negiz joq», dedi N.Nazarbaev.
Men de úreıge berilýge esh negiz joq dep bilemin. Sebebi elimiz egemendik alǵaly beri jınaǵan áleýetimiz osy synnan ótýge tolyq múmkindik beredi. Eń aldymen Ulttyq qorymyzdy atap ótý qajet. Olaı deıtinim, COVID-19 vırýsymen kúresýge jáne ekonomıkalyq daǵdarystyń aldyn alýǵa arnalǵan sharalardyń barlyǵy eń aldymen qarjy máselesine kelip tireledi. Osy sharalardy iske asyrý kezinde de Ulttyq qordyń úlesi mol bolmaq. Elbasy da bul týraly «Bizde osyndaı qıyndyq týǵanda eshkimge alaqan jaımaý úshin urpaq qamy, el bolashaǵy úshin jınaqtalǵan Ulttyq qor men altyn-valıýta qorynda 90 mıllıard AQSh dollary bar. Retimen, únemdi paıdalanar bolsaq, ol búgin basymyzǵa túsken taǵdyr men tarıh synynan eńsemizdi tik ustap ótýimizge mol múmkindik beredi» dep aıryqsha atap ótti. Endeshe, alańdaýdyń, ýaıymǵa berilýdiń jóni joq. Onyń ústine, indettiń aldyn alý maqsatynda elimizde 10 mlrd AQSh dollary bólindi.
Taǵy bir aıta keterligi, jyl basynda 2020 jylǵa arnalǵan bıýdjetti bekitken edik. Alaıda ornaǵan qıyn jaǵdaılarǵa baılanysty oblystyq bıýdjetterge taǵy da qosymsha qarajat bólinip otyr. О́tken 90-jyldary osyndaı qıyndyqtar ornaǵan bolsa, kerisinshe, bekitilgen bıýdjet kólemi qysqartylatyn edi. Alaıda bul joly bári kerisinshe bolyp otyr. Iаǵnı áleýmettik sala sanalatyn mektep, aýrýhana, emhana syndy birqatar nysandar jóndelip, keıbiri qaıtadan salynady. Aýyldarǵa sý qubyry, eldi mekenderge gaz jetkiziledi. Osy sharalardyń barlyǵy qıyn kezeńdi eńserýge jaqsy kómek bolady dep senemin.
Dúnıe júzin sharlaǵan epıdemııa men daǵdarystyń kesiri elimizdi aınalyp ótpesi belgili. Dese de, Elbasy osy qıyndyqtarmen halyq bolyp kúresýimiz qajet ekenin alǵa tartyp otyr. Elimizdegi aǵa urpaq pen zııaly qaýym ókilderine, jas urpaqqa, kásipkerlerge sózin arnap, izgi amaldar jasaýǵa úndedi. Soǵan qulaq túrýimiz qajet. «Jumyla kótergen júk jeńil» deıdi halqymyz. Bul zaýaldy da el bolyp eńseremiz dep senemin!
Shavhat О́TEMISOV,
Májilis depýtaty