Almaty oblysynda Qyzyl kitapqa engizilgen qaraquıryqty atqan qoryqshy ustaldy dep habarlaıdy Polisia.kz.
Arnaıy operasııa barysynda krımınaldyq Polısııa Basqarmasynyń qyzmetkerleri zańsyz ań aýlaǵan, sondaı-aq qarý men onyń oq-dárilerin zańsyz saqtaǵan «K» esimdi ulttyq tabıǵı saıabaqtyń memlekettik ınspektoryn ustady. Sot sanksııalaǵan tintý barysynda polısııa qyzmetkerleri azamattan boljam boıynsha Qyzyl kitapqa engizilgen «Qaraquıryqtyń» etin jáne tirkelmegen oqtary bar oıyq atys qarýynyń eki birligin taýyp, tárkiledi.
«Ustalǵan azamat óziniń jaǵdaıyna baılanysty bekitilip berilgen ańshylyq alqaptarda janýarlar dúnıesin qorǵaýdy qamtamasyz etýge, ań aýlaý erejelerin buzýdyń jolyn kesýge tıis bolatyn. Alaıda, onyń ornyna ol Ulttyq saıabaqtyń aýmaǵyndaǵy erekshe qorǵalatyn aımaqta janýarlardy óltirgen. Osy aqparatty alǵannan keıin jedel ýákilder qadaǵalaý júrgizip, onyń barlyq zańsyz áreketterin dáleldedi», – dep habarlaıdy Almaty oblysy PD Tergeý basqarmasynyń aǵa tergeýshisi Ernar Qaltaev.
Atalǵan derek sotqa deıingi tergep-tekserýdiń biryńǵaı tizilimine QR Qylmystyq kodeksiniń 337-baby 4-bóliginiń 1,2,3-tarmaqtarymen, 287-babynyń 3-bóligimen tirkeldi. Kúdikti ýaqytsha ustaý oqshaýlaǵyshyna qamaqqa alynyp, sot-bıologııalyq saraptama taǵaıyndaldy.