Kókshetaýda koronavırýs indetine qarsy sharalar kúsheıe tústi. Bul mańyzdy iske eńbek ujymdary, qala turǵyndary jáne eriktiler belsene atsalysýda.
Qazaqstan Respýblıkasynyń IIM qarasty Kókshetaý tehnıkalyq ınstıtýtynyń oqytýshylary men qyzmetkerleri arnaıy jospar quryp, eki aptadan beri turǵyn úı aýlalarynda, saýda oryndarynda, kóshe boılary men aıaldamalarda, basqa da kópshilik oryndarynda dezınfeksııalyq jumystardy júrgizýde.
Biz oblystyq kópbeıindi aýrýhana aýmaǵynda zalalsyzdandyrý isimen aınalysyp jatqan aq kombınızondy jıyrma kisiniń ortasynda júrgen ınstıtýt bastyǵy, azamattyq qorǵaý polkovnıgi Syrym Sháriphanovty sózge tarttyq.
–Bul bizdiń azamattyq jáne kásibı turǵydaǵy paryzymyz,–deıdi ol. Karantındik rejımge baılanysty, elimizdiń barlyq óńirinen kelgen kýrsanttar úılerine qaıtarylyp, onlaın-dárister alýda. Sondyqtan, joǵary basshylyqtyń kelisimimen, ınstıtýtta kezekshilikten jáne sabaqtan bosatylǵan ofıserler men serjanttardan iriktelgen erikti jasaq quryldy. Eki zvenoǵa bólingen qurylymdardy podpolkovnık Azat Qusaıynov pen maıor Sýltan Arıfdjanov basqarady.
Bul bastamany Kókshetaý ákimdigi qoldap, qorǵanys kıimderin, dezınfeksııalyq zattar men arnaıy quraldar bóldi. Jumys barysyndaǵylar ıyqqa asatyn bir quraldyń dári-dármegi 700 sharshy metrge jetetinin jáne 200 metr saıyn tolyqtyrylyp otyrylatynyn aıtady. Keshegi kúni ınstıtýt eriktileri 42 myń sharshy metr aýmaqty zalalsyzdandyrǵan. Munyń ózi 10 shashyratqysh quraldyń júktemesi tolyǵymen atqarylǵanyn bildiredi.
Instıtýttyń azamattyq qorǵanys jáne áskerı daıyndyq kafedrasy bastyǵynyń mindetin atqarýshy Sultan Arıfjanovtan tómendegideı málimetterdi aldyq: «Jumys kestesi boıynsha biz 2 sáýirden bastap bes kún qatarynan «Ortalyq», «Altyn Plaza», «Jibek joly» bazarlarynda, N.Nazarbaev, Abylaı han dańǵyldary men Aqan seri, E.Áýelbekov kósheleriniń boıyndaǵy nysandarda, Naýan haziret atyndaǵy ortalyq meshit, saýda ortalyqtarynda, azyq-túlik qoımalarynda, sporttyq nysandarda, mektepter aýmaǵynda «Dıahlor qospasy» suıyǵymen óńdeýmen aınalystyq. Osy esepti merzimde 14,5 tonnadan astam dári jumsalyp, 249,3 myń sharshy metr alań talapqa saı óńdeldi» deıdi S.Arıfdjanov.
Instıtýt eriktileri bul jumys jalǵasa beretinin jáne kez kelgen ýaqytta alǵy shepten kórinýge daıyn ekendiktirin bildirdi.
Kókshetaý qalasy