Bul kúnderi Ekaterınbýrgtiń «Avtomobılıstinde» óner kórsetip júrgen qazaqstandyq hokkeıshi Naıdjel Doýstyń kelisimsharty 30 sáýirdi aıaqtalady.
Beıresmı málimetterge sensek, Doýstyń kelisimshartty odan ári uzartýǵa asa qulqy joq kórinedi. Onyń maqsaty – «Barysqa» qaıta oralý. 35 jastaǵy Kanadanyń Vınnıpeg qalasynyń týmasy 2011-2018 jyldar aralyǵynda elordalyq komanda sapynda oınady. Sol kezderi 415 ret muz aıdynyna shyǵyp, 376 upaı jıdy. Tarqatyp aıtsaq, 217 gol soǵyp, 159 ret nátıjeli pas berdi. Kezinde ol komandanyń kapıtany da boldy. Alty ret Qurlyqtyq hokkeı lıgasynyń (QHL) «Juldyzdar matchynda» oınady.
Naıdjel Doýs 2004 jáne 2005 jyldary Kanadanyń jastar quramasy sapynda álem birinshiliginde qatysty. Aıtýly jarystyń alǵashqysynda kúmis alsa, ekinshisinde bas júldeni oljalady. Eń úzdik shabýylshy jáne surmergen ataǵyn ıelendi. 2016 jyly Qazaqstannyń azamattyǵyn alyp, sol kezden beri bizdiń eldiń ulttyq quramasynyń sapynda óner kórsetýde.