1 sáýirde Atyraý oblysynda KTK arnasy jýrnalısteriniń ustalǵany týraly habar taraǵan bolatyn. Atalmysh oqıǵaǵa qatysty búgin QR Aqparat jáne qoǵamdyq damý mınıstri Dáýren Abaev pikir bildirdi, dep habarlaıdy QazAqparat tilshisi.
Atap aıtqanda keshe aımaq ákimdigi jýrnalısterdiń karantın rejımin buzǵany týraly habarlama taratqan edi.
«Elde qazirgi ýaqytta tótenshe jaǵdaı engizilgenin, qatań karantındik sharalar qabyldanǵanyn túsinemiz. Bári de qyzmette. Alaıda jergilikti bılikti baspasóz jumysyna túsinistikpen qaraýǵa shaqyramyn. Bizdegi aqparat boıynsha jýrnalıster karantındik shekteýlerdi ádeıi buzbaǵan. Tótenshe jaǵdaı - jýrnalısterdiń quqyǵyn shekteýge syltaý bola almaıdy. Jýrnalıster qazir qaýyrt jumysta, durys aqparat alý quqyǵymyzdy iske asyra otyryp, aldyńǵy shepte júr. Ol týraly umytpaıyq», - dedi Dáýren Abaev.