Bıylǵy jańa oqý jylynyń alǵashqy kúnderinde Memleket basshysynyń Jarlyǵymen Aslan Bákenuly Sárinjipov Bilim jáne ǵylym mınıstri bolyp taǵaıyndaldy. Ol osyǵan deıin bilim salasynda mol tájirıbe jınaqtaǵan. Bul týraly Bnews.kz habarlady.
A. B. Sárinjipov 1974 jyly 17 sáýirde týǵan. Ekonomıka ǵylymdarynyń kandıdaty, joǵarǵy bilimdi ákimshilendirý salasyndaǵy Pensılvanııa ýnıversıtetiniń doktory (AQSh).
Qazaq memlekettik ekonomıkalyq ýnıversıtetin, Oklahoma ýnıversıtetin (AQSh), Vena dıplomatııalyq akademııasyn bitirgen. Sonymen birge, Garvard ýnıversıteti Kennedı atyndaǵy memlekettik saıasat mektebinde taǵylymdaman ótken.
1996 jyly eńbek jolyn Ortalyq Azııa memleketaralyq keńesi atqarýshy komıtetiniń referenti bolyp bastady.
1997 jyly Syrtqy ister mınıstrliginiń ortalyq apparatyna aýysty. 1998-2002 jyldary Qazaqstannyń AQSh-taǵy elshiliginde ekonomıkalyq máseleler jónindegi attashe qyzmetin atqardy (Vashıngton).
2002-2007 jyldary Dúnıejúzilik banktiń Orta Azııa boıynsha ınfraqurylymdar, qarjylyq naryq jáne bilim máseleleri jónindegi joba úılestirýshisi boldy. Sondaı-aq, elimizde Bilim berýdi damytýdyń memlekettik baǵdarlamasyn ázirleýge qatysty.
2007-2009 jyldary Úkimet pen Ulttyq banktiń janyndaǵy «Ulttyq taldaý ortalyǵy» AQ basqarmasy tóraǵasynyń orynbasary qyzmetin atqaryp, ekonomıkalyq damý, qarjy jáne bilim salalaryna jetekshilik jasady.
2009-2013 jyldary «Nazarbaev ýnıversıteti» derbes bilim berý uıymy atqarýshy keńesiniń tóraǵasy boldy. «Nazarbaev Ýnıversıteti» bilim mektebiniń qaýymdastyrylǵan professory.
«Nazarbaev ýnıversıteti» DBBU-nyń qurylǵanynan bastap qamqorshylyq keńesiniń múshesi.
2012 jyly «Qurmet» ordenimen marapattaldy.
Jalpy, A. B. Sárinjipov «Nazarbaev Ýnıversıtetin» qurýshylardyń biri bolyp sanalady. Al jaqynda ol buqaralyq aqparat quraldary ókilderine bergen suhbatynda myna jaıdy basa atap ótti: «Men bul qyzmetke jańadan taǵaıyndalǵandyqtan, mekemeniń jumysyna endi ǵana aralasa bastadym. Taıaý arada baǵdarlama ázirlep, halyqqa tanystyramyn. Maǵan deıin atqarylǵan jumystar bar, olardy da basshylyqqa ala otyryp áreket jasaımyn. Úlken ister atqaryldy, durys jolǵa qoıylǵan kóptegen máseleler de barshylyq. Memleket basshysy taǵy birqatar mindetter júktedi. Belsendi jumys isteýge tyrysamyz jáne taıaý arada atqarylǵan jumystarmen aldaryńyzǵa qaıta shyǵamyz».
Ámirhan Almaǵanbetov.