Ǵalymdar egin egý kezinde fermerlerge áleýmettik jeliler men jedel habarlamalar arqyly keńes beredi. Bul týraly Aýyl sharýashylyǵy mınıstrliginiń baspasóz qyzmeti habarlady.
Eldegi tótenshe jaǵdaıǵa baılanysty «Ulttyq agrarlyq ǵylymı-bilim berý ortalyǵy» KeAQ ǵalymdary Facebook, Instagram, Telegram jáne basqa ınternet-resýrstar arqyly fermerlerge qashyqtyqtan konsýltasııalar uıymdastyrýda. 30 naýryzdan bastap «UAǴBO» KeAQ-nyń, QazUAÝ jáne aýyl sharýashylyǵy jáne ósimdik sharýashylyǵy, maqta sharýashylyǵy, jemis-jıdek, kúrish, mal sharýashylyǵy ǵylymı-zertteý ınstıtýttarymen birlesip 55 myń fermerge kóktemgi dala jumystaryna daıyndyq boıynsha 7 onlaın-keńes ótkizdi.
Internet arqyly konsýltasııalar suraq-jaýap túrinde júrgizildi. Fermerlerdi elıtalyq tuqymdarmen qamtamasyz etý, tyńaıtqyshtardy durys qoldaný, parazıtter men aýrýlarǵa qarsy agrohımııalyq sharalar júrgizý, uryqtandyrýdyń jasandy tehnologııalaryn engizý, jerdiń qunarlyǵyn jaqsartý jáne basqa da máseleler qyzyqtyrdy.
Sharýalar ózderin tolǵandyrǵan suraqtaryn keńes barysynda qoıyp, ǵalymdardan tushymdy jaýap aldy. Onlaın kezdesýden keıin ǵalymdar jeke usynystary men tujyrymdamalaryn fermerlerdiń elektrondy poshtasyna joldady.
«Qazir egis kezinde fermerlerge qoldaý kórsetý óte mańyzdy. Búgingi qıyn jaǵdaıda zamanaýı tehnologııalardyń kómegimen Qazaqstannyń fermerlerine keńester berip, kómektesýdi jalǵastyramyz. UAǴBO-nyń barlyq fılıaldary, ǵylymı-zertteý ınstıtýttary men tájirıbe stansalary, fermerlerge áleýmettik jeliler men messendjerler arqyly óz usynystaryn beredi», - dedi UAǴBO-nyń basqarma tóraǵasy Tóleýtaı Rahymbekov.
Onyń aıtýynsha, egis maýsymyna deıin UAǴBO-nyń ǵalymdary qazaqstandyq fermerler úshin 230 onlaın-keńes ótkizýdi josparlap otyr.
О́tken jyly UAǴBO 610 konsýltasııa uıymdastyrsa, al ortalyqtyń enshiles kompanııalary myńnan astam aqparattyq-túsindirý is-sharalaryn, onyń ishinde 742 aýylsharýashylyq óndiris ortalyqtary úshin 160-tan astam keńes ótkizgen bolatyn.