Batys Qazaqstan oblysynda «COVID-19» ınfeksııasyn juqtyrǵan adamdardyń sany 23 sáýirdiń tańynda 86-ǵa jetti. Sońǵy anyqtalǵan 10 adamnyń 9-y – Reseı Federasııasynan kelgen vahtalyq jumysshylar.
- Koronavırýstyq ınfeksııa tabylǵan bul 9 jumysshynyń bireýi – Túrkistan oblysynyń turǵyny, 8-i – batysqazaqstandyqtar. Sonymen birge, Oral qalasynda turatyn 48 jastaǵy turǵynnan da ınfeksııa tabyldy. Ol koronavırýstyq ınfeksııa juqtyrǵan adammen qarym-qatynasta bolǵany úshin karantındik stasıonarda jatqan bolatyn, - deıdi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaev.
Reseı Federasııasymen shekaradaǵy «Syrym» jáne «Tasqala» avtoótkelderindegi sanıtarlyq-karantındik beketterde epıdemıolog mamandarmen qashyqtyq termometrııa jáne saýalnama júrgizý kezinde azamattardyń densaýlyqtaryna shaǵymdary bolmaǵan. Algorıtmge sáıkes, SKP epıdemıologtary jedel járdem shaqyryp, azamattar karantındik stasıonarlarǵa jatqyzyldy.
Oqyrmandarymyzdyń baıqap otyrǵanyndaı, Batys Qazaqstan oblysynda anyqtalǵan naýqastardyń 90%-dan astamy – Reseı Federasııasynan kelgen óz azamattarymyz. Halyq arasynda osy jaǵdaılarǵa alańdap, «shekarany múldem jabý kerek, eshkimdi kirgizbeý qajet» degen pikirler de aıtylyp qalyp jatyr. Osyǵan oraı óńir basshysy Ǵalı Esqalıev arnaıy málimdeme jasady:
«Qazirgi jaǵdaı turǵyndardy alańdatyp otyrǵanyn jaqsy túsinemin. Sońǵy kúnderi koronavırýstyq ınfeksııaǵa shaldyqqandar sany kúrt ósti. Olardyń 92%-y Reseı Federasııasynan kelgen bizdiń eldiń azamattary. О́ńir turǵyndarynyń keıbiri Reseı Federasııasymen shekarany tolyqtaı jabý týraly suraıdy. Biraq myna jaıttardy eskergen jón:
Birinshiden, olar bizdiń eldiń azamattary. Sonyń ishinde basym bóligi Batys Qazaqstan oblysynyń turǵyndary. Olardy qorǵaý – memlekettiń eń basty maqsaty. Ekinshiden, Reseı Federasııasynan keletin azamattar shekaradan birden karantındik nemese provızorlyq stasıonarǵa barlyq sanıtarlyq talaptar saqtalyp jetkizilýde. Úshinshiden, tranzıttik júk kóliginiń 4 júrgizýshisi bar. Olar basqa eldiń azamattary. Qazirgi ýaqytta Qazaqstanǵa taýar ákeletin nemese basqa elderge tranzıtpen ótetin tranzıttik júk kólikterin qospaǵanda, sheteldik azamattarǵa, sondaı-aq kóliktiń kez kelgen túrine kirýge tyıym salyndy. Eger taýarlardy ákeletin júk kólikterine tyıym salynsa, bul taýarlardyń jetispeýine jáne baǵanyń ósýine ákelip soǵady. Barlyq tranzıttik kólik bekitilgen bir janarmaı beketinde toqtaıdy. Olarǵa oblys terrıtorııasynyń basqa jerinde toqtaýǵa tyıym salyndy. Kólikterdi qala aýmaǵynan patrýldik polısııa mashınalary shyǵaryp salady» dedi oblys ákimi.
Qazir Batys Qazaqstan oblystyq juqpaly aýrýlar aýrýhanasynda 84 adam emdelip jatyr. Eki adam jazylyp shyqty.
Provızorlyq stasıonarda - 20, karantındik stasıonarda - 56, úı oqshaýlaýynda - 1181 adam dárigerler baqylaýynda.
Batys Qazaqstan