Elimizde jarııalanǵan tótenshe jaǵdaı kásiptiń qaı salasy úshin de ońaı soqpady. Áıtse de, olarǵa osy kúrdeli kezeńde kásipkerlik palatasy kóp kómek kórsetip keledi. Palata qoldaýymen máselesi oń sheshilgen qyzylordalyq dıqandardyń bul sózimizdiń dáleli.
Tótenshe jaǵdaıǵa oraı Prezıdent áleýmettik mańyzy bar 19 túrli azyq-túlik taýaryn óndirýshi kásipkerlerge qatysty qosymsha qun salyǵyn 12 %-dan 8 %-ǵa deıin túsirýge tapsyrma bergen bolatyn. Qabyldanǵan bul sheshim 1 qazanǵa deıin kúshinde bolady eken. Alaıda bul jeńildikti kúrishshilerdiń ala almaı qalý kaýpi boldy.
Áleýmettik mańyzy bar azyq-túlik taýarlarynyń tizilimi Úkimettiń 2020 jylǵy 27 naýryzdaǵy № 141 qaýlysymen bekitilgen. Bul qujat kúrishshilerdiń túsinispeýshiligin týdyrdy. Sebebi Úkimettiń qaýlysyndaǵy tizilimde kúrish «aqtalǵan domalaq dándi kúrish» dep kórsetilgen. Al otandyq kúrishshiler tek ortasha dándi aqtalǵan kúrish shyǵarady. Qujatta bar, qoldanysta joq kúrish osy saladaǵy kásip ıelerine aıtarlyqtaı júk bolýy múmkin edi. Qyzylorda oblysy kásipkerler palatasynyń mamandary máseleni jan-jaqty saralap, «Atamekenniń» ortalyq apparatyna problemany jetkizdi. О́z kezeginde ortalyq apparattan usynys tıisti mınıstrlikterge jetti. Palatanyń usynysyna Memlekettik kirister komıteti resmı túsindirme berip, ekonomıkalyq qyzmet túrleriniń jalpy jikteýishine «ortasha dándi aqtalǵan kúrish» dep engizdi. Nátıjesinde kúrishshiler jeńildikke qol jetkizip, problemasy oń sheshildi.
Kúrishtiń eksportqa shyǵarý da palatanyń aralasýymen sheshimin tapty. Eýrazııalyq ekonomıkalyq komıssııa dúnıe júzinde jarııalanǵan pandemııaǵa oraı birqatar azyq-túlik túrlerin osy jyldyń 30 maýsymyna deıin Eýrazııalyq ekonomıkalyq odaq elderinen ózge elderge shyǵarýǵa tyıym salyp, onyń ishinde kúrish te enip ketken bolatyn. Bul jańalyq qyzylordalyq dıqandar úshin aıtarlyqtaı problema boldy. Oblystaǵy aýyl sharýashylyǵy taýaróndirýshileri osy jyldyń kúz mezgiline deıin úshinshi elderge eksportqa kúrish jetkizip berý úshin aldyn ala uzaq merzimdi kelisim-shartqa qol qoıyp qoıǵan. Bul saladaǵy kásipkerlerimizdiń negizgi tabysy eksportqa táýeldi. Sondyqtan da Kásipkerler palatasy «Atamekenniń» ortalyq apparatyna usynys jiberip, olar shuǵyl tıisti mınıstrlikterge shyǵyp, kásipkerlerdiń problemasyn jetkizdi. Nátıjesinde, qazaqstandyq kúrish eksportqa kedergisiz shyǵatyn boldy.
Aımaqta kóktemgi dala jumystarynyń bastalýy karantın rejımimen qatar keldi. Tehnıkalarǵa qajetti qosalqy bólshekter, ózge de qural-saımandar bolmaı, qınalǵan dıqandar máselesin kásipkerler palatasynyń mamandary oblystyq jedel shtab otyrysynda kóterip, Qyzylorda qalasynda qosalqy bólshekterdi satatyn kásipkerlerdiń tizimi ázirlenip, jumys jasaýyna ruqsat berildi.