Tótenshe jaǵdaı rejimine baılanysty elimizde 1,6 mln-nan astam qaryz alýshynyń qaryzyn óteý merzimi keıinge shegerildi. Jeńildikpen kredıtteý baǵdarlamasy boıynsha 246 kásipkerdiń ótinishi maquldandy. 1,7 mln adam áleýmettik járdemaqy alý úshin tólem kartasy men kartochkalyq shot ashty.
Qarjy naryǵyn retteý jáne damytý agenttigi halyq pen bıznesti qoldaý jónindegi sharalardyń oryndalý monıtorıngin jalǵastyrýda. Agenttiktiń habarlaýynsha, 28 sáýirge deıin ekinshi deńgeıli bankterge jáne ózge de nesıeleý uıymdaryna qaryzdar men mıkrokredıtter boıynsha tólemderdi toqtata turý týraly 1 844 599 ótinim tústi. Onyń ishinde 1 831 489 ótinish jeke tulǵalardan bolsa, 13 110 shaǵyn jáne orta kásipkerlik sýbektisi tótenshe jaǵdaı kezeńinde kredıtter boıynsha merzimdi keıinge shegerýdi suraǵan. Nátıjesinde 1 661 232 jeke tulǵa 237,4 mlrd teńge somaǵa nemese barlyq qaryz alýshynyń 31,3%-y tólemderdi toqtata turýǵa múmkindik aldy. Onyń 299 363-i halyqtyń áleýmettik jaǵynan osal toptarynyń ókilderi ekenin aıta ketý kerek.
Sonymen birge 11 561 shaǵyn jáne orta kásipkerlik sýbektisiniń jalpy somasy 138,8 mlrd teńgeni quraıtyn nesıesi keıin óteletin boldy. Qalǵan ótinimder qaralyp jatyr, 10 jumys kúni ishinde olar boıynsha tıisti sheshimder qabyldanýǵa tıis.
Búgingi tańda elimizde shamamen 5,3 mln azamattyń – 4,4 trln teńgege jýyq, 26,2 myńǵa jýyq shaǵyn jáne orta kásipkerlik sýbektisiniń – 3,9 trln teńgege tarta banktik qaryzdary men mıkrokredıttik uıymdarǵa bereshegi bar.
– Ekinshi deńgeıdegi bankterden alynǵan derekterge sáıkes, shaǵyn jáne orta bıznes sýbektileri men jeke kásipkerler 274,8 mlrd teńge nesıe alýǵa 1 313 ótinim berdi. Onyń ishinde jalpy kólemi 62,5 mlrd teńgeni quraıtyn 246 ótinish maquldandy, – dep habarlady Qarjy naryǵyn retteý jáne damytý agenttiginiń baspasóz qyzmeti.
Tótenshe jaǵdaı kezinde áleýmettik járdemaqy alý úshin 1,7 mln adam tólem kartochkasyn jáne kartochkalyq shot ashty. Prezıdent Q.Toqaevtyń Memlekettik komıssııanyń 2020 jylǵy 10 sáýirdegi otyrysynda bergen tapsyrmasy sheńberinde Qarjy naryǵyn retteý jáne damytý agenttigi ekinshi deńgeıdegi banktermen tólem kartochkalaryn bankterdiń bólimshelerine barmaı-aq qashyqtan alý algorıtmin daıyndaǵan bolatyn.
– Osyǵan deıin barlyǵy 1 013 558 azamat qashyqtan kartochkalyq shot jáne tólem kartochkasyn ashty, tólem kartochkalary 700 myńdaı klıenttiń úıine jetkizilip berildi. Qashyqtan «Qazaqstannyń Halyq banki» AQ – 564 615, Kaspi Bank – 358 884, Forte Bank AQ – 26 745, «Bank Sentr kredıt» AQ –
25 258 tólem kartochkasyn ashqan. «Qazposhta» AQ 88 397 tólem kartochkasyn azamattardyń úıine aparyp berdi, – dep habarlady agenttik.
Prezıdent tapsyrmasy boıynsha Ulttyq bank Qarjy naryǵyn retteý jáne damytý agenttigimen birlesip Shaǵyn jáne orta kásipkerlik sýbektilerin jeńildikpen kredıtteý baǵdarlamasyn ázirlegen bolatyn. Baǵdarlamany iske asyrý úshin shaǵyn, orta kásipkerlik sýbektilerine jáne dara kásipkerlerge ekinshi deńgeıdegi bankterge negizdelgen salymdar ornalastyrý arqyly 600 mlrd teńge bólindi.
Bıznesti qoldaý tetigi ekinshi deńgeıdegi bankterdiń tótenshe jaǵdaıdy engizý nátıjesinde zardap shekken shaǵyn jáne orta kásipkerlik sýbektilerine, jeke kásipkerlerge aınalym kapıtalyn tolyqtyrý úshin 12 aıǵa deıingi merzimge jyldyq 8%-dan aspaıtyn mólsherleme boıynsha jeńildikpen kredıtter berýi arqyly iske asyrylady. Ekinshi deńgeıdegi bankter qarajatty 3 aı ishinde tolyq ıgerýge tıis.
Qarajat kimderge beriledi? Baǵdarlama sheńberinde ıgerilýge tıis qarajat ShOB sýbektilerine kredıt berýge jumsalýǵa tıis. Ár qaryz alýshyǵa qatysty aqsha kólemine lımıt qoıylǵan. Ol zańdy tulǵalarǵa, shaǵyn jáne orta kásipkerlik sýbektileri úshin 3 mlrd teńgeden aspaıdy; jeke kásipkerlerge beriletin eń úlken nesıe – 50 mln teńge.