Elbasynyń bastamasymen qurylǵan «Birgemiz» qory 330 myń muqtaj otbasyna 50 myń teńgeden birjolǵy qarjylaı kómek aýdardy. Birer kúnde taǵy da 30 myńnan astam otbasy qamtylatyn bolady. Bul týraly qordyń Qamqorshylar keńesiniń tóraǵasy Baýyrjan Baıbek Facebook jelisindegi paraqshasynda jazdy.
Sonymen birge ol Jeńistiń 75 jyldyǵy qarsańynda «Birgemiz» qorynan Uly Otan soǵysynyń 40 myń qatysýshysy men múgedegi, sondaı-aq tyl eńbekkerleri 50 myń teńgeden tólemaqy alǵanyn, 800-den astam ardager men 8 myń tyl eńbekkerine azyq-túlik sebetteri men jeke qorǵanys quraldary jetkizilgenin, ardagerlerge qoldaý kórsetý jumystary ári qaraı da jalǵasatynyn atap ótti.
Kómek alýshylardyń tizimderi Eńbek jáne halyqty áleýmettik qorǵaý mınıstrliginiń usynymy negizinde belgilengen 7 kategorııa boıynsha ákimder tarapynan berilgen bolatyn.
Olardyń ishinde az qamtylǵan jáne kóp balaly otbasylar, muqtaj múgedek jandar, múmkindigi shekteýli bala tárbıelep otyrǵan otbasylar, eń tómengi zeınetaqy alatyn jáne áleýmettik jaǵynan álsiz topqa kiretin zeınetkerler, jetim balalar, UOS ardagerleri men olarǵa teńestirilgen tyl eńbekkerleri bar.
«Qordan beriletin kómektiń ekinshi tolqyny aıasynda 10,5 mlrd teńge kóleminde qarajat bólindi. Qor resýrstary shekteýli, sol sebepti qoldaý shynynda kómekke muqtaj, materıaldyq jaǵdaıy tómen azamattarǵa ǵana kórsetiletin bolady», dedi qor tóraǵasy Rýslan Sakeev.