Elimizde tótenshe jaǵdaıǵa baılanysty sharalar der kezinde qolǵa alyndy. Qytaıda oqyp jatqan jáne sol elge saparlap barǵan azamattarymyzdy aýrý juqtyrmastan buryn tegis elge ákelgeni indettiń aldyn alýdyń óte bir myqty qadamy boldy dep esepteımin. Ony basqa elder jasady ma, jasamady ma bilmeımin, al bizdiń azamattardyń indet órship turǵan jerden Otanyna qaıtýy naǵyz halyqqa jasalǵan qamqorlyq bolǵany anyq.
Prezıdent Q.Toqaevtyń tótenshe jaǵdaıdy 11 mamyrǵa deıin uzartý jónindegi sheshimi de óte quptarlyq, óıtkeni aýrý órshý shyńyna áli jetken joq. Keıbir jerlerde vırýs juqtyrý tómendegenimen, keı óńirlerde shyrqaý bıigi áli alda, sondyqtan da uzartý saıasatyn qoldaımyn. Tipti mamyrdyń 11-nen keıingi qadam jóninde de bir oılanyp alý qajet bolar. Osy sharalar arqyly búginde elimizde aýyrǵandar sany da, qaıtys bolǵandar sany da ózge elderdeı shyǵandap ketpedi. Shvesııa, Shveısarııa, Belarýs Respýblıkasy syndy memleketter aýrýǵa qarsy sharalardy qarastyrmap edi, endi onyń salqynyn, zardabyn tartyp jatyr. Qazaqtyń «Alynbaıtyn qamal, jeńilmeıtin jaý joq» degen sózi ras. El bolyp oqshaýlanyp edik, bul baǵyttaǵy is nátıjeli bolyp jatyr. Áıtpegende kóptegen azamatymyzdan aıyrylyp qalar edik.
Prezıdent bul joly da medısınaǵa degen kózqaras ózgeretinin, salany qarjylandyrý kúsheıetinin, medısınany damytý, reformalaý qajettigin basa aıtty. Bul – óte durys sheshim. Iаǵnı kózge kórinbeıtin vırýs tek medısınaǵa emes, jalpy adamzattyń ómirlik kózqaras, ustanymyna da ózgeris engizip jatyr.
Osy qıyn kúnderde medısına qyzmetkerleri maıdannyń alǵy shebindegi sarbazdardaı eńbek etýde. Tótenshe jaǵdaı oryn alǵan kezde, aldymen qutqarýshylar zardap shekpeı me, sol tárizdi bizdiń dárigerler men meıirbıkelerimiz alǵy shepte aıanbaı eńbek etýde. Memleket medısına qyzmetkerlerine qosymsha aqy tóleýdi qarastyrdy. Joǵary deńgeıdegi ústemeaqy tólenip jatyr. Bul densaýlyq kúzetindegi jandarǵa jasalǵan úlken qurmet, qamqorlyq dep sanaımyn. Biz dárigerler qaýymy muny óte joǵary baǵalaımyz.
Jaqsylyq DOSQALIEV,
medısına ǵylymdarynyń doktory, professor