Kóne grek tarıhshysy Gerodot jazyp ketken saqtar týraly (skıfter) ańyzda qamshy týraly mynadaı derek bar. Elý jyl boıy joryqta júrgen saq jaýyngerleri eline qaıtady. Uzaq jyldar boıy erlerin kútip habar bolmaǵan soń, áıelderi ózderiniń quldaryna tıip olardan bala týady.
Saq jaýyngerleri eldiń shetine jetkende quldan týǵan uldar qoldaryna qarý ustap shyǵyp, olardy elge kirgizbeı soǵys salady. Aıqas uzaqqa sozylyp, quldardy jeńe almaǵan saqtar keńes qurady. Sonda bir danagóı qarııa: «Eı, saq jaýyngerleri, osy biz ne istep júrmiz? Biz óz quldarymyzben soǵysyp júrmiz. Bizder qarýmen soǵysqandyqtan olar ózderin teń sanap, jeńis bermeı júr. Bar qarý-jaraqtaryńyzdy tastap, olarǵa uzyn taspaly qamshy alyp shyǵyńdar. Olar qamshy-bıshiktiń sýylyn estip, ózderiniń qul ekenin esine túsirsin» depti.
Saqtar bul keńesti maqul kórip, taspaly qamshymen quldarǵa qarsy shyǵady. Qamshynyń sýyldaǵan ysylyn estigen quldar aıqasty umytyp, qandaryna sińgen quldyǵy oıanyp, boılaryn úreı bılep, maıdan dalasyn tastap, basy aýǵan jaqqa qasha jónelgen eken.