Tótenshe jaǵdaı rejımin qamtamasyz etý jónindegi óńirlik jedel shtabtyń málimetine súıensek, olardyń basym bóligin tártip saqshylary men medısına qyzmetkerleri quraıdy.
Qaýipti indetti juqtyrý qaýpi bar topqa shetelge shyǵatyn tulǵalar, Ishki ister jáne Qorǵanys mınıstrlikteriniń, Ulttyq qaýipsizdik komıteti departamentteriniń, shuǵyl kómek kórsetetin qala men aýdan ákimdikteriniń qyzmetkerleri, Ulttyq Ulan ókilderi jatady. Tegin testten aımaqtyń tynys-tirshiligin qamtamasyz etetin uıymdar men áleýmettik mekemelerdiń, BAQ-tyń ókilderi men ınfeksııalyq, provızorlyq jáne karantındik stasıonarlardyń medısınalyq qyzmetkerleri de ótedi.
– PTR jáne ekspress-testter ınfeksııany juqtyrý qaýpi bar topqa jatatyn adamdar úshin bıýdjet esebinen satyp alyndy. Aldyńǵy shepte jumys istep júrgen qyzmetkerler 17 sáýirden beri osyndaı testten ótkizilýde. Qazirge deıin Atyraý oblysynyń myńǵa jýyq turǵynynan synama alyndy. Al qalǵan bóligin jaqyn arada ótkizý josparlanyp otyr, - dep habarlady óńirlik jedel shtabtan.
Sondaı-aq, óńirdiń barsha turǵynyna «Olımp» zerthana jelisinde PTR-testten aqyly túrde ótýge múmkindik berilip otyr.