Maqtaaral aýdanynda Arystyń tájirıbesine sáıkes tıisti jumystar júrgiziledi. Oblys ákimi О́mirzaq Shókeev sý basqan aýyldarǵa baryp, jaǵdaımen tanysty. Aýdan ákimi B.Asanovqa tótenshe jaǵdaıdan zaqym kelgen áleýmettik nysan men japa shekken mal-múlik sanyn anyqtaýdy tapsyrdy. Soǵan sáıkes, uıymdastyrý jumystary júrýde. Qazirgi tańda tórt eldi mekennen 5400-den astam adam evakýasııalandy.
Maqtaaral aýdanyndaǵy tótenshe jaǵdaıǵa baılanysty ótken baspasóz máslıhatynda osyndaı derekter keltirgen Nur Otan partııasy oblystyq fılıaly tóraǵasynyń birinshi orynbasary Beısenbaı Tájibaev oblys ákimi shtab otyrysyn ótkizip, barlyq jaýapty sala mamandaryna tapsyrma bergenin atap ótti. «Turǵyndar Atakent kenti men Esentaev, Igilik, Bereke, QazSSR 40 jyldyǵy aýyldaryndaǵy mektepterge ornalastyrylýda. Olarǵa qajetti taǵamdar jetkizilip, medısınalyq kómekter kórsetilýde. Bul jumystar irgeles jatqan Saryaǵash, Keles, Jetisaı, Shardara aýdandaryna tapsyryldy. Sondaı-aq, jergilikti kásipkerler de óz úlesterin qosýda. Myrzakent kenti kóshirilmeıdi. Onda sý basý qaýpi joq. Maqtaaral aýdanyndaǵy jaǵdaı tolyq baqylaýda», dedi Beısenbaı Dáýletuly.
Al oblystyq ekonomıka jáne bıýdjetti josparlaý basqarmasynyń basshysy Arman Abdýllaev zardap shekken turǵyndar ornalasyp jatqan mektepterde barlyq qaýipsizdik sharalary saqtalyp jatqandyǵyn jetkizdi. «Mektepterde arnaıy medısına qyzmetkerleri men aýdandardan 12 maman qyzmet kórsetýde», dedi basqarma basshysy. Ol sondaı-aq sý basqan aýyldaǵy mal jáne egistik, turǵyn úı men áleýmettik nysandardyń naqty shyǵynyn anyqtaý maqsatynda barlyq tıisti basqarma basshylary da aýdanǵa arnaıy shaqyrtylǵanyn jetkizdi.