ARDAGERLER ÁRKEZ QURMETKE LAIYQ

Keshe Parlament Senatynda Uly Otan soǵysyndaǵy Jeńistiń 65 jyldyǵyna oraı respýblıkalyq Ardagerler keńesiniń músheleri, astanalyq soǵys jáne eńbek ardagerlerimen kezdesý boldy. Mereıtoıǵa baılanysty bi­rin­shi ret ótkizilip otyrǵan bul sharany Senat Tóraǵasy Qasym-Jo­mart Toqaev ashyp, sóz sóı­le­di. О́ziniń sózin jınalǵan ar­da­ger­lerdi Jeńis merekesimen qut­tyq­taýdan bastaǵan Tóraǵa odan ári bul mereke – Otan qorǵaý­dyń óshpes ónegesi men erliktiń eren úlgisin eske túsiretin adam­zat tarıhyndaǵy eń aıtýly kún­der­diń biri. Biz ar men namysty tý etken batyrlardyń rýhy al­dyn­da taǵzym etemiz. Qan maı­dan­da ot keshkenderge alǵysy­myz­dy bildire otyryp, basy­myz­dy ıemiz. Sizder el basyna kún týǵanda jaýyngerlik erlik pen eldiktiń ónegesin kórsettińizder, adam tózgisiz qıynshylyqtardy jeńe otyryp, eldiń tiregine aı­nal­dyńyzdar. Jeńimpaz urpaq­tyń dańqty erligi jasymas ji­ger­diń, uly rýhtyń, Otanymyzdyń er­kindigi men táýelsizdigi jo­lyn­daǵy bizdiń halqymyzdyń rýhanı birliginiń úlgisi bolyp qala beredi. Al búgingi urpaqtyń pa­ry­zy – osy Uly Jeńistiń mańyzy men mánin qas­terleı bilý, batyr­lardyń bıik tulǵalaryn ýaqyt ótken saıyn asqaqtatyp, esimderin júrekte saqtaý. Olarǵa degen qur­met tarıhqa, ata-baba rýhyna degen qurmet, dedi. Sonymen qatar ol 1 mln. 700 myń otandastarymyz adam­zat tarıhynda teńdesi bolma­ǵan soǵystyń barlyq maıdan­da­ry­na da qatysyp, erliktiń eren úlgi­lerin kórsetkenin aıtty. Bes júzge jýyq qazaqstandyq Keńes Oda­ǵy­nyń Batyry ataǵyn aldy, júz myń­daǵan ákelerimiz ben ata­la­ry­myz orden-medaldarmen nagrad­tal­dy. Solardyń arasynda óziniń qolbasshylyq daryny men ǵa­jaı­yp erliginiń arqasynda Baýyrjan Momyshulynyń, panfılovshy-batyrlardyń, pýlemetshi Mánshúk Mámetovanyń, mergender Álııa Moldaǵulova men Ybyraıym Sú­leımenovtiń, ushqyshtar Talǵat Bı­geldınov pen Sergeı Lýgan­skıı­lerdiń jáne basqalardyń esim­deri bizdiń elimizdiń ataǵyn aspanǵa shyǵardy deı kelip, 1418 kúnge sozylǵan soǵys kún saıyn 20 myńǵa jýyq adamnyń ómirin qıyp otyrǵanyn eske saldy. Son­dyqtan da Ekinshi dúnıe­júzilik so­ǵystyń tarıhı mańyzyn tómen­de­tip, onyń qorytyndy­laryn qaıta qaraý qajet dep júrgen keıbir saıasatkerler men ǵalymdarǵa ózi­miz­diń qarsy pikirimizdi bildirýimiz kerek. Menińshe fashızmdi jer betinen qurtqan Uly Jeńistiń máni men mańyzyn esh tómendetýge bol­maıdy, dedi ol. Odan ári Qasym-Jomart Ke­mel­uly Elbasy Nursultan Nazar­baevtyń tapsyrmasymen uly me­re­kege oraı kóptegen is-shara­lar­dyń atqarylyp jatqanyn aýyzǵa aldy. Prezıdent óziniń jyl saıyn­ǵy Joldaýynda bul iske arnaıy kóńil bólip, ardagerlerdiń turmys-jaǵdaıyn jaqsartý úshin naqty  tapsyrmalar berip otyra­dy, dedi. Sóziniń sońynda arda­ger­lerdi taǵy da quttyqtap, olarǵa den­saýlyq pen urpaq qyzyǵyna kenelip, uzaq ómir tileıtinin jetkizdi. Jıynǵa ardagerlermen qatar “Nur Otan” HDP hatshysy S.Gro­mov, Eńbek jáne halyqty áleý­met­tik qorǵaý mınıstri G.Ábdi­halyqova, Qorǵanys mınıstriniń orynbasary B.Súleımenov jáne bir top senatorlar qatysty. Tór­aǵa sózinen keıin kezdesýdi onyń uıytqysy bolǵan Senattyń Áleý­mettik-mádenı damý ko­mı­teti­niń tóraǵasy Ahan Bıjanov júrgizip otyrdy. Alǵashqy qut­tyqtaý sózdi ol “Nur Otan” HDP hatshysy S.Gromovqa berdi. Ol partııanyń atynan ardagerlerdi quttyqtap, óz taraptarynan bo­latyn ulyqtaý sharalaryna sholý jasap ótti. Bizdiń qatarymyzda búgingi kúni 50 myńnan artyq 60 jastan asqan adamdar bar, biz olardyń aqyl­da­ry men tájirıbelerin joǵary ba­ǵa­lap, qoldanyp otyramyz, dedi ol. Odan keıin sóz alǵan Eńbek jáne halyqty áleýmettik qorǵaý mınıstri G.Ábdihalyqova Úkimet tarapynan ardagerlerge jasalatyn qurmetterdi sanamalap berip, sosyn óz tarapynan mınıstrlik qyzmetkerleriniń bir kúngi eń­bek­aqysyn olardyń qoryna aýdara­ty­nyn jetkizdi. Qorǵanys mı­nıstr­ligi salasyndaǵy arda­ger­lerdiń qalaı qurmettelip, Jeńis kúni merekesiniń qoıylymy qalaı bolatyndyǵy jóninde Qorǵanys mınıstriniń orynbasary Bolat Sembınov baıandady. О́z kezeginde sóz alǵan soǵys ardagerleri Qama­taı Toqabaev pen Leonıd Kar­taý­zov kórsetilip jatqan qurmetke al­ǵystaryn jetkizdi. Al respýb­lı­ka­lyq Ardagerler keńesiniń tóraǵasy Qaıyrbek Súleımenov keıbir problemalardy da atap ótip, olardyń qalaı sheshilip jatqanyna toqtaldy. Sonyń ishin­de ardagerler úshin oblys ortalyqtarynda arnaýly úı­lerdiń ashylatynyn qýanyshpen jetkizdi. Jaqsybaı SAMRAT.