«Aýyl» partııasynyń «Biz Maqtaraldyqtarmen birgemiz» atty qaıyrymdylyq avtokerýeni Maqtaral aýdanyndaǵy topan sýdan zardap shekken aýyldarǵa attandy. Júk kólikterine tıelgen 20 tonnadan astam azyq-túlik О́zbekstandaǵy sý qoımasynyń buzylýy saldarynan qıyndyqqa tap bolǵan otandastarymyzǵa taratylady.
Qaıyrymdylyq aksııasy «Aýyl» partııasynyń tóraǵasy, QR Parlamenti senatynyń depýtaty Álı Bektaevtyń bastamasy boıynsha qolǵa alyndy. «Aýyl» partııasynyń barlyq aımaqtardaǵy fılıaldary partııa tóraǵasynyń bastamasyn qoldap, osyndaı syn saǵatta Maqtaraldyqtarǵa kómek qolyn sozýǵa sheshim qabyldap, qaıyrymdylyq avtokerýenin uıymdastyryp, jedel túrde zardap shekken aımaqtarǵa eń qajetti azyq-túlik túrlerin jiberdi.
Partııanyń Shymkent qalasyndaǵy fılıal tóraǵasy Qanat Dosalıev: «Aýyl» partııasy – naǵyz patrıottardyń partııasy. Dál búgingideı sátte barlyq aımaqtardaǵy fılıaldarymyz judyryqtaı jumylyp, osy sharaǵa atsalysýda. Qıyndyqqa kóp bolyp qarsy turý, zardap shekkenderge járdemdesý - bizdiń atadan kele jatqan ıgi saltymyz, Qazaqstan halqynyń eń asyl qasıetteriniń biri dep esepteımin» dedi.