Úkimetke О́zbekstandaǵy sý qoımasy bógetiniń buzylýy saldarynan sý basqan aýyldarymyzdyń turǵyndaryna jan-jaqty materıaldyq kómek kórsetý tapsyryldy. Túrkistan oblysynyń birde-bir turǵyny nazardan tys qalmaıdy, dep jazǵan edi óziniń týıtterdegi paraqshasynda Prezıdent Q.Toqaev.
Al Túrkistan oblysynyń Maqtaaral aýdanyndaǵy eldi mekenderdi sý basýyna qatysty másele qaralǵan Úkimettiń selektorlyq otyrysynda Premer-Mınıstr Asqar Mamın Úkimettik komıssııa Jańaturmys, Jeńis, Fırdoýsı, О́rgebas, Dostyq aýyldaryna keltirilgen zalalǵa shuǵyl baǵalaý júrgizetinin málim etti. Odan soń ınjenerlik, kólik, áleýmettik ınfraqurylym men turǵyn úıdi qalpyna keltirý jumystary bastalady. Sondaı-aq A.Mamın Úkimet zardap shekkenderge barlyq qajetti kómekti kórsetetinin málimdedi.
Túrkistan oblysy Maqtaaral aýdanynda oryn alǵan tótenshe jaǵdaı saldarynan búgingi tańda, aldyn ala esepteýler boıynsha, 845 turǵyn úıdi, 3 mektep, 5 balabaqsha, 4 medısına nysany men mádenıet úıin, 10 dúkendi sý basqan. Jeńis aýylyndaǵy kópirdi jáne respýblıkalyq, oblystyq, aýdandyq mańyzy bar 54,7 shaqyrym avtojoldardy sý shaıdy. «QazSýshar» RKM-niń 5 mamyr kúngi derekteri boıynsha Jeńis eldi mekeninde sý deńgeıi 2 santımetrge, Jańaturmys aýylynda – 3, Araı eldi mekeninde – 4, О́rgebas aýylynyń kireberisinde 6 santımetrge tómendegen. Degenmen, eldi mekenderdi sý basýynyń aldyn alý maqsatynda atqarylyp jatqan ister báseńsigen joq, kerisinshe qosymsha kúshter jumyldyrylyp jalǵasyn tabýda. Bul oraıda halyqty qulaqtandyrý maqsatynda Maqtaaral aýdanynyń 15 eldi mekeninde 38 dabyldy eskertý qurylǵysy ornatylǵan. Nurly jol, О́rgebas, Yrysty, Jantaqsaı eldi mekenderinde bógetter salynyp, Myrzakent kenti baǵytynda Fırdoýsı eldi mekeniniń aýmaǵynda 3 kollektor ornatylǵan. Budan bólek Maqtaaral aýdany aýmaǵynan aǵyn sýdy tez arada shyǵarý maqsatynda О́zbekstan Respýblıkasy tarapynan Jetisaı aýdany, Qoǵaly eldi mekeniniń mańynan «Ortalyq Betpaqdala kollektory» arqyly avtojol kópirin aınalyp ótetin kanal qazyldy.
Maqtaaral aýdanyndaǵy tótenshe jaǵdaı boıynsha atqarylyp jatqan jumystardy baıandaǵan oblys ákimi О́mirzaq Shókeev osyndaı derekter keltirdi. Aýdanda qoǵamdyq tártipti saqtaý jáne sý basqan turǵyn úılerdiń múlkin qorǵaý úshin 8 blok-beket ornatylyp, Polısııa departamentiniń jeke quramynan jalpy 335 qyzmetker men 57 arnaıy avtokólik jumyldyrylǵan. «Aldyn ala jınaqtalǵan málimetter boıynsha kólemi 7639 gektar egistik jerdi sý basqan. Sonymen qatar mal shyǵyny naqtylanýda. Qazirgi tańda osy joǵaryda atalǵan shyǵyndardy eseptep jatyrmyz», dedi О́mirzaq Shókeev. Sondaı-aq oblys ákimi jalpy 31 606 turǵyn 14 eldi mekennen evakýasııalanǵanyn, 7 eldi mekende sý basý qaýpi áli de joǵary ekenin aıtyp ótti. Al Myrzakent jáne Aqjol eldi mekenderiniń turǵyndary óz úı-jaılaryna qaıta oralýda. Avarııalyq-qutqarý jumystaryn júrgizý úshin aýdanda tótenshe jaǵdaı jarııalanǵaly beri 986 adam, 10 dana júzý qurylǵysy, 180 birlik tehnıka jumyldyryldy. Sonymen qatar Qyzylorda, Jambyl oblystary men Shymkent qalasynan 30 ónimdiligi joǵary sý jınaǵysh soraptar kómekke kelip jetti. Budan bólek Ulttyq ulan áskerı bóliminen 413 áskerı qyzmetker men 37 birlik tehnıka tartyldy. Qosymsha Almaty qalasynan Ulttyq ulannyń qutqarý batalonynan 320 áskerı qyzmetker men 26 birlik tehnıka keldi.
Jergilikti basshylar tasqyn sý oryn alǵan aýyldardyń halqymen kezdesip, túsindirý jumystaryn júrgizýde. Mysaly, Maqtaaral aýdanynyń ákimi Baqyt Asanov tasqyn sý astynda qalǵan aýyldardyń turǵyndarymen júzdesýinde qaýipsiz aýmaqqa kóshirilgen halyqqa Úkimet tarapynan naqty kómek kórsetiletinin atap ótti. Zardap shekken aýyl azamattarynyń árqaısysyna ótemaqy tólenetinin jetkizdi. Sondaı-aq aýdan ákimi áleýmettik jeliler, messendjerler men BAQ arqyly tarap jatqan sý tasqyny jónindegi túrli burmalaýshylyqtarǵa qatysty óz pikirin bildirdi. «Halyq durys, ıaǵnı resmı, shynaıy aqparat alýy kerek. Ásirese áleýmettik jelilerde aýmaqtaǵy jaǵdaıǵa qatysty eldi dúrliktiretin jalǵan aqparattar taralyp jatyr. Eń bastysy, adam shyǵynynan amanbyz. Al shyǵyndar eseptelip, tolyq óteledi», dedi aýdan ákimi.
Evakýasııa oryndary retinde bekitilgen mektepter men kolledj, meshitterde ornalasqan turǵyndar osyndaı qıyn-qystaý kezeńde qolushyn sozyp jatqan Memleket basshylyǵyna, Úkimetke, oblys, aýdan basshylaryna jáne barlyq qazaqstandyqtarǵa shynaıy alǵystaryn aıtýda. Al osy evakýasııalyq pýnktterdegi balalar 6 mamyrdan bastap sabaqtaryn qashyqtan jalǵastyratyn bolady. Bul rette bilim basqarmasy oqýlyqtar men oqý quraldary tıelgen júk kóligin Maqtaaralǵa jibergen. Sondaı-aq kórshiles oblystar men kásipkerler tarapynan túrli kómekter kórsetilip, qoldaý bildirilýde. Mysaly, Jambyl oblysy ákimdigi atynan 30 tonna, «Salıqaly urpaq» qoǵamdyq qorynan 20 tonna azyq-túlik kelip jetti. Oblystyq, aýdan, qalalyq máslıhat depýtattary jalpy somasy 21 mln teńge bolatyn, al saryaǵashtyqtar jalpy quny 1 mln 735 myń teńgeniń gýmanıtarlyq kómegin kórsetti.
Túrkistan oblysy