Ekibastuzdaǵy 9-shy shaǵyn aýdannyń bir ǵana aýlasynan úsh chempıon shyqqan. Olar – kıkboksshy Nursultan Hasanov, djıý-djıtsý sheberi Dıas Erenǵaıypov jáne kásipqoı boksshy Musa Tursynǵalıev.
Bizge mundaı qyzyqty derekti Ekibastuz qalasynyń turǵyny Jomart Matenov habarlady. Onyń aıtýynsha, bir aýladan jastary shamalas úsh chempıonnyń shyǵýy - sırek kezdesetin jaǵdaı.
– Búginde úsheýi de sportsúıer qaýymǵa tanymal. Olardyń bir aýlada erjetip, álemdik sporttyń shyńyn baǵyndyrýy – maqtanarlyq jáne jastarǵa úlgi bolarlyq jaǵdaı, – deıdi Jomart Matenov.
Belgili bolǵandaı, Musa Tursynǵalıev akademık Mardanov kóshesindegi 23-úıde, Dıas Erenǵaıypov Sátbaev kóshesindegi 48-úıde, al Nursultan Hasanov Estaı Berkimbaev kóshesindegi 104/2-úıde turǵan.
Qyzyq úshin Ekibastuzdyń elektrondy kartasyna úńilip, sportshylar turǵan úılerdiń ornalasýyna nazar aýdardyq. Shynymen de, úsh úı úsh túrli kóshemen atalsa da, bir-birine óte jaqyn ornalasqan eken.
Sporttaǵy qadamdaryn Ekibastuzda bastaǵan sportshylardan qazir týǵan qalasynda turyp jatqany Dıas qana. Ol osy shahardan «Yerengaipov Team» degen jeke klýbyn ashyp, jergilikti jastardy jekpe-jek ónerine baýlýda. Nursultan Hasanov - búginde Pavlodar qalasynyń turǵyny. Ishki ister organdarynda qyzmet atqarady. Al Musa sporttyq mansabyna baılanysty muhıt asyp, AQSh-ty meken etýde.
Endi sportshylardyń jetistikterine az-kem toqtalyp óteıik. Úsh sportshynyń ishinde jas jaǵynan úlkeni – Nursultan Hasanov. Ol 1991 jyldyń 7 mamyrynda dúnıege kelgen. Qazaqstannyń Eńbek sińirgen jattyqtyrýshysy Sabyrjan Jaqypovtyń shákirti.
Nursultan - Azııanyń eki dúrkin chempıony. 2012 jáne 2015 jyldary Saryqurlyqtyń teńdessiz sportshysy boldy. Al 2017 jyly Vengrııa astanasy Býdapeshtte ótken Álem birinshiliginde chempıon atanyp, el mereıin ósirdi. Byltyr Reseıdiń Anapa qalasynda uıymdastyrylǵan Álem kýbogynda top jaryp, qorjynyn kezekti qomaqty júldemen tolyqtyrdy. Bir sózben aıtsaq, Nursultan Hasanov dál qazirgi ýaqytta Pavlodar óńiriniń mańdaıaldy sportshylarynyń kóshin bastap tur.
Jekpe-jek óneriniń jankúıerlerine Dıas Erenǵaıypovtyń esimi jaqsy tanys. Ol 1995 jyly týǵan. Aralas jekpe-jekten el namysyn qorǵap júr. Osy kúnge deıin kásipqoı rıngte 11 kezdesý ótkizip, sonyń segizinde jeńiske jetken. Qaısybir jarysta Sheshenstan prezıdenti Ramzan Qadyrovtyń ózin ónerimen tánti etkeni bar. Sol kezde bizdiń sportshyǵa rıza bolǵan Qadyrov tik turyp qurmet kórsetip, qolyn qysqan-dy.
Dıas Erenǵaıypovtyń 2017 jyly djıý-djıtsýdan Italııada ótken álem birinshiliginde chempıon bolǵanyn bóle-jara atap ótýge tıispiz. Sondaı-aq, ol jekpe-jek pen djıý-djıtsýdan bólek, qoıan-qoltyq urys, pankratıon, grepplıng sekildi sport túrlerin de jaqsy meńgergen. Joǵaryda atap ótkenimizdeı, qazir sporttyq mansabyn jalǵastyra júrip, jeke klýbyn ashyp, shákirt tárbıeleýde.
Búginde Musa Tursynǵalıevti de bilmeıtin adam kemde-kem. Kásipqoı boksta qarsylas shydatpaı júrgen sharshy alań sheberi 1994 jyly týǵan. Jartylaı jeńil salmaqta óner kórsetetin Musa, osy kúnge deıin 10 jekpe-jek ótkizip, barlyǵynda jeńiske jetti. Sonyń altaýyn ýaqytynan buryn, ıaǵnı nokaýtpen aıaqtaǵan.
Musanyń myqtylyǵyna tańdaı taqqandar kóp. Máselen, ol kásipqoı rıngtegi alǵashqy jekpe-jegin 2017 jyldyń qarasha aıynda ótkizdi. Ol dál sol jyly Meksıkada 19 kúnniń ishinde alty kezdesýge shyǵyp, barlyǵynda qarsylastaryn tizerletti.
Musa osy jyldyń naýryzynda AQSh-ta argentınalyq Esekel Tevespen qolǵap túıistirýge tıis edi. Alaıda, jekpe-jek koronavırýsqa baılanysty keıinge shegerildi. Aıtpaqshy, Musa - jartylaı jeńil salmaq-ta WBA-ǵa (Búkilálemdik boks qaýymdas-tyǵy) qarasty NABA (North America Boxing Association – Soltústik Amerıka boks qaýym-dastyǵy) tujyrymynyń chempıony.
Atap óterligi, úsh jerlesimiz de sporttyq mansabyn áli aıaqtaǵan joq. Qaıta, naǵyz babynda júr. Demek, olardyń altyn-kúmis ıelenip, Qazaqstannyń abyroıyn odan ári asqaqtatýǵa múmkindikteri mol. Judyryǵy joıqyn, tepkisi temir jigitterdi jeńis tuǵyrynan ǵana kóreıik!
Farhat ÁMIRENOV,
Ekibastuz qalasy.