Qazaq dalasynda kıikter tóldeı bastady. Bul jóninde Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet áleýmettik paraqshasynda habarlap, quralaılardyń sýretimen bólisti.
«Búgingi kúndi súıinshi suraýdan bastaǵym keledi. Birneshe kún buryn kıikter tóldeı bastady. Nazarlaryńyzǵa jańa týǵan quralaılardyń sýretterin usynamyn. Tuqym jalǵastyrý – árbir tirshilik ıesi úshin mańyzdy kezeń», – deıdi Sáken Dildahmet.
Onyń aıtýynsha, kıikter jyl saıyn mamyr aıynyń basynda tóldeıdi. Bul kezeń birneshe aptaǵa ǵana sozylady eken.
«Kıikter tóldegende aýa raıy buzylyp, jel turady. Halqymyz bul ýaqytty «Quralaıdyń salqyny» dep ataıdy. Tóldeý kezinde kıiktiń erkegi olardy aınala júrip, jyrtqyshtardan qorǵaıdy. Al Ohotzoopromnyń ınspektorlary men Orman sharýashylyǵy jáne janýarlar dúnıesi komıtetiniń aýmaqtyq departamentteri kıikterdi brakonerlerden qorǵaıdy», – dep jazdy komıtet ókili.