Qorǵanysy myqty memlekettiń táýelsizdigi de baıandy bolmaq. Áskerı qyzmette júrip osyǵan kózim jetti. Baǵzy babalarymyz naızanyń ushymen, bilektiń kúshimen saqtap qalǵan atamekendi qorǵaý paryzy endi búgingi urpaqtyń úlesinde tur.
Meniń áskerı ómirge qadamym osydan tup-týra segiz jyl buryn bastaldy. 2012 jyly Almatydaǵy Qurlyq áskerleriniń áskerı ınstıtýtyna qabyldanyp, komanda-taktıkalyq tank áskerleri mamandyǵy boıynsha bilim aldym. Tórt jyldan soń 2016 jyly atalǵan ınstıtýtty altyn medalmen támamdap, Elbasy – Tuńǵysh Prezıdent Nursultan Nazarbaevtyń qolynan leıtenant ataǵyn aldym. Sol jyly vzvod komandıri retinde Desanttyq-shabýyldaýshy áskerleriniń qolbasshylyǵyna qarasty 12740 áskerı bólimine keldim. Osy áskerı bólimde kúni búginge deıin qyzmet etip kelemin. Búginde shabýyldaýshy tank rotasynyń komandırimin.
Memleket tarapynan áskerı qyzmetshilerge qomaqty qoldaý kórsetilip, sarbazdardyń turmys-áleýeti de jaqsaryp keledi. Oǵan – ózim de kýámin. Máselen, 2017 jyly Qorǵanys mınıstriniń qolynan Saryózekte jańadan soǵylǵan turǵyn úıden eki bólmeli páterdiń kiltin aldym. Otbasyn quryp, bala ósirip otyrmyz.
Qazaqstan áskeriniń qazirgi qaýqaryn bizdiń áskerı bólimniń jetistikterine qarap-aq baǵamdaýǵa bolady. Aıtaıyn, shabýyldaýshy tank batalonynyń komandıri, maıor Janat Qýanyshev 2013 jyly Máskeýde ótken tank bıatlonynda júldeli 2-orynnan kórindi. 2018 jyly Qazaqstannyń Qurlyq áskerleri arasynda ótkizilgen «Mergender batalony» saıysynda bizdiń batalon 3-oryndy ıelendi. 2015 jyly jáne 2019 jyly batalonymyz «Aıbalta» jaýyngerlik oqý-jattyǵýlarynda úzdik kórsetkishke qol jetkizdi. О́tken jyly shabýyldaýshy tank rotasynyń serjanty Azat Shoıynbaev Máskeýde ótken tank bıatlonynda 2-oryndy jeńip alyp qana qoımaı, «Álemniń úzdik kózdeýshisi» ataǵyn ıelenip, Qazaqstanǵa oralǵan soń II dárejeli «El qorǵany» medalimen marapattaldy. Men de osy tektes saıystarǵa birneshe ret qatysyp, kózge tústim. Máselen, 2018 jyly Desanttyq-shabýyldaýshy áskerleriniń rotalary arasynda «Tank rotasynyń úzdik komandıri» marapatyn ıelendim.
Bul jetistikter bir ǵana áskerı bólimniń, batalonnyń ǵana emes, bútin bir Qazaqstan áskeriniń jetistigi retinde baǵalandy dep bilemin. El áskeriniń kún sanap artyp kele jatqan áleýeti aldaǵy ýaqytta budan zor asýlardan asatynyna senimdimin.
Serik AITBEKOV,
Desanttyq-shabýyldaýshy áskerleri qolbasshylyǵyna qarasty 12740 áskerı bóliminiń shabýyldaýshy tank rotasynyń komandıri