Nur-Sultan ákimdigi Túrkistan oblysyna gýmanıtarlyq kómekpen júk mashınalaryn jiberdi, dep habarlady qala ákimdiginiń baspasóz qyzmeti.
Maqtaaral aýdanynyń turǵyndary úshin 40 tonna taýar jınaldy. Onyń ishinde 20 tonna birinshi qajettiliktegi azyq-túlik: un, kúnbaǵys maıy, qant, kúrish, makaron, sondaı-aq gıgıena quraldary: untaqtar, sabyn, shampýn.
«Sonymen qatar, biz Maqtaaral aýdanyna sekýndyna 300 lıtr sý soratyn arnaıy sorǵy stansııasyn jiberemiz. Qurylǵy bir saǵatta 1300 tekshe metr sý tartady. Bul qalalyq Tótenshe jaǵdaılar departamentimen birlesken jumys», – dedi qala ákimdiginiń ókili Nurlan Sydyqov.
Kómek qatarynda qurylysqa qajetti qural-saımandar, barlyq tósek jabdyqtary bar júzden astam kereýet, ydys-aıaq, sýdy sorýǵa arnalǵan jeti sorǵy bar.
«Biz bul kómek Elordadan Maqtaaral aýdanynda bolǵan tótenshe jaǵdaıdy eńserýge kómektesetinine senimdimiz», – dedi N.Sydyqov.
Buǵan deıin habarlanǵandaı, Nur Otan partııasynyń ortalyq apparaty elordadan Túrkistan oblysyna 40 tonnadan astam gýmanıtarlyq kómek, onyń ishinde azyq-túlik jáne jeke gıgıena ónimderin jibergen bolatyn.
Sonymen qatar júzden astam elordalyq erikti sý tasqynynan zardap shekken Túrkistan oblysyna kómek kórsetýge attandy.