Túrkistan oblysynyń ákimi О́mirzaq Shókeev Maqtaaral aýdanyndaǵy sý astynda qalǵan aýyldardyń halqymen kezdesip, olarǵa memlekettik komıssııa sheshimin jetkizdi. Ýaqytsha ashylǵan ortalyqtarda azamattardyń turmystyq jaǵdaılarymen tanysyp, muń-muqtajyn tyńdady.
Saryaǵash aýdanynyń ákimdigine bekitilgen Igilik aýylyndaǵy orta mekteptegi evakýasııalyq bekette Jańaturmys aýylynyń 200-den astam turǵyny ornalasqan. Barlyq evakýasııalyq ortalyqtar azyq-túlik pen birinshi qajettiliktegi zattarmen, úsh mezgil ystyq tamaqpen qamtylǵan. Medısına jáne polısııa qyzmetkerleri táýlik boıy qyzmet etedi. «Sý astynda qalǵan aýyldyń árbir turǵyny 100 myń teńgeden kómek alady. Myrzakent eldi mekeninde jańa yqsham aýdan soǵylady. Ol jerge Jeńis, Jańaturmys, Dostyq aýyldary tolyqtaı kóshiriledi. Jańa qalashyqta ortalyqtandyrylǵan aýyzsý jáne gaz tartylyp, elektr jaryǵy, baılanys jelisi, joldar jasalatyn bolady. Jańa mektep, balabaqsha, ıaǵnı, áleýmettik nysandar salynady. Eń bastysy aýyzbirshiligimiz ajyramaı, bar qıyndyqty el bolyp eńserýimiz qajet», dedi aýyl turǵyndarymen kezdesýde О́mirzaq Shókeev.
Keles aýdanyna bekitilgen Fırdoýsı aýylynyń 530 turǵyny orta mektepte ýaqytsha mekendeýde. Sýdan zardap shekken О́rgebas jáne Fırdoýsı halqyna tańdaý berildi. Oblys ákimimen kezdesýde eki aýyl turǵyndarynyń ózge eldi mekennen boı kóteretin jańa yqshamaýdanǵa kóshe alatyny aıtyldy. Memleket tarapynan úıler qalpyna keltiriledi, eger árbir turǵyn úıin ózi salýǵa nıet bildirse, oǵan ótemaqy tólenedi. Turǵyndar sheshimdi shuǵyl túrde ózara aýylaralyq jınalysta sheshetin boldy. Budan bólek, turǵyndar apat aımaǵynda júrgiziletin qurylysqa shaqyryldy. Qurylys jumysyna qatysýshy azamattarǵa jalaqy tólenedi. Sondaı-aq, aýyl sharýashylyǵy taýar óndirýshileriniń shyǵyny da óteledi. Nesıe tóleý ýaqyty keıinge shegeriledi. Al, joǵalǵan maldyń shyǵyny tótenshe jaǵdaı boıynsha shtab janynan qurylǵan komıssııa sheshimi negizinde ótelmek.
Sondaı-aq oblys ákimi №5 mektep-gımnazııasyna jaıǵastyrylǵan Jeńis eldi mekeni men sý basý qaýipi joǵary Nurlyjol aýylynyń halqymen kezdesti. Ortalyqqa jaýapkershilik Shardara aýdanynyń ákimdigine bekitilgen. Maqtaaral aýdanynyń aýmaǵyndaǵy 11 evakýasııalaý ortalyqta 2404 adam ornalastyrylǵan. Al tótenshe jaǵdaıǵa qatysty ashylǵan arnaıy qoımada 232 tonnadan astam azyq-túlik qory jınalǵan. Et, un, kúrish, maı jáne kıim-keshek pen kúndelikti qoldanysqa qajetti zattar evakýasııalyq ortalyqtardaǵy turǵyndarǵa kúndelikti taratylýda. Syn saǵatynda qol ushyn sozǵan óńirdiń barlyq aýdandary men ózge oblystardan gýmanıtarlyq kómekter jetkizilýde. Baqylaý Nur Otan partııasy oblystyq fılıaly basshylyǵyna júktelgen.
Túrkistan oblysy