Qasym-Jomart Toqaev Vladımır Pýtınmen telefon arqyly sóılesti. Bul týraly Aqordanyń baspasóz qyzmeti habarlady.
Memleketter basshylary birin-biri Uly Otan soǵysyndaǵy Jeńistiń 75 jyldyǵymen quttyqtady.
Qazaqstan Prezıdenti atalǵan datanyń fashızmge qarsy ıyq tiresip soǵysqan burynǵy Keńes Odaǵynyń barlyq halqy úshin asa mańyzdy ekenin atap ótip, eki eldiń ardagerlerine myqty densaýlyq, uzaq ǵumyr tiledi. Reseı Prezıdenti Qazaqstan halqyna baq-bereke tilep, júrekjardy sálemin joldady. Taraptar koronavırýs pandemııasyna qarsy kúres máselesin talqylaý kezinde eki eldiń osy baǵytta tyǵyz yqpaldastyq ornatqanyn aıtty. Vladımır Pýtın Qazaqstan Úkimetiniń indetke qarsy kúres jónindegi sheshimderi men is-qımyldaryn Reseı tarapy muqııat baqylap otyrǵanyn jetkizdi. Osy rette Reseı Prezıdenti elimizde júrgizilip jatqan halyqqa, shaǵyn jáne orta bızneske qoldaý kórsetý sharalaryn joǵary baǵalap, barlyq is-árekettiń der kezinde qabyldanyp, tıimdi júzege asqanyn atap ótti.
Áńgime sońynda Qasym-Jomart Toqaev pen Vladımır Pýtın Joǵary Eýrazııalyq ekonomıkalyq keńestiń aldaǵy ýaqytta ótetin otyrysyna daıyndyq máselelerin talqylady.