Memleket basshysy Qasym-Jomart Toqaev qazaqstandyqtardy Jeńistiń 75 jyldyǵymen quttyqtady. Bul týraly Aqordanyń baspasóz qyzmeti habarlady.
Qurmetti otandastar!
Barshańyzdy Uly Otan soǵysyndaǵy Jeńistiń 75 jyldyǵymen shyn júrekten quttyqtaımyn!
Bul mereıli mereke qanquıly jaýdy kúırete jeńip, týǵan jerin qorǵap qalǵan ákelerimiz ben atalarymyzdyń óshpes erligin dáripteıdi.
Qazaqstandyqtar qıyn-qystaý kezeńde batyrlyq pen janqııarlyqtyń jarqyn úlgisin kórsetti. Maıdanǵa attanǵan 1 mıllıon 200 myń azamatymyzdyń jartysy elge oralǵan joq.
Talǵat Bıgeldınov, Sergeı Lýganskıı, Leonıd Beda, Álııa Moldaǵulova, Mánshúk Mámetova, Ivan Pavlov, Baýyrjan Momyshuly, Saǵadat Nurmaǵambetov, Málik Ǵabdýllın, Hıýaz Dospanova, Raqymjan Qoshqarbaev jáne basqa dańqty batyrlarymyzdyń esimderi máńgi este saqtalady.
Soǵys jyldarynda Qazaqstanǵa kóshirilgen júzdegen óndiristik jáne ónerkásiptik kásiporyndarda myńdaǵan otandasymyz eńbek etip, Uly Jeńisti jaqyndatýǵa úles qosty. Árbir on oqtyń toǵyzy Qazaqstanda óndirilgen qorǵasynnan quıyldy. Aýyl halqy jaýyngerlerdi azyq-túlikpen qamtamasyz etý úshin aıanbaı ter tókti.
Biz erjúrek aǵa býynnyń aldynda máńgi qaryzdarmyz. Olardyń qaısarlyǵy men tózimdiliginiń, tabandylyǵy men patrıottyǵynyń arqasynda beıbit zamanda ómir súrip, jarqyn bolashaǵymyzǵa jol ashtyq.
Bıyl mereke kúni ózgeshe ahýalǵa tuspa-tus kelse de maıdangerlerdiń eshbiri eleýsiz qalǵan joq.
Ardagerlerimizge myqty densaýlyq jáne baq-bereke tileımin!
Elimizde árdaıym beıbitshilik pen tynyshtyq bolsyn!