Italııanyń dańqty fýtbolshysy, álemdegi eń úzdik qorǵaýshylardyń biri sanalatyn Franko Barezı búgin mereıli 60 jasqa tolyp otyr.
Franko 1960 jyldyń 8 mamyrynda Italııanyń Lombardııa óńirinde týyp-ósti. 1977 jyldan bastalyp, 1997 jylǵa deıin jalǵasqan sporttyq karerasyn ol tek jalǵyz ǵana «Mılan» klýbynda ótkizdi. Aıtýly komanda sapynda 532 ret jasyl alańǵa shyqty. Sol aralyqta Italııa chempıonatyn alty jáne Italııa sýperkýbogyn tórt márte ıelendi. Chempıondar lıgasy men Eýropa sýperkýbogyn úsh retten oljalady. Eki ret Qurlyqaralyq kýbogyn enshiledi.
О́z eliniń ulttyq quramasy sapynda Franko Barezı 81 kezdesý ótkizip, 31 ret komanda kapıtany retinde jasyl alańǵa shyqty. Bul rette de qol jetkizgen tabysy tolaǵaı. Atap aıtsaq, 1982 jylǵy álem chempıonatynda – altyn, 1990 jyly – qola jáne 1994 jyly – kúmis medaldi ıemdendi. 1988 jylǵy Eýropa birinshiliginiń qola júldegeri.
Frankonyń ózinen eki jas úlken týǵan aǵasy – Djýzeppe Barezı de kezinde óte tanymal fýtbolshylardyń biri boldy. Ol 14 jyl boıy «Interdiń» namysyn qorǵap, Italııa quramasy sapynda 18 kezdesý ótkizdi.