Sońǵy kúnderi Maqtaaral jáne Jetisaı aýdandarynyń eldi mekenderindegi apat saldary eldi ábden ábirgerge salǵany kórip otyrmyz. Buǵan deıin habarlanǵandaı, Almaty qalasynyń ákimi, «Nur Otan» partııasy Almaty qalalyq fılıalynyń tóraǵasy Baqytjan Saǵyntaevtyń tapsyrmasymen gýmanıtarlyq kómek jınaqtaldy.
Elbasymyzdyń bastamasymen qurylǵan «BizBirgemiz» aksııasy aıasynda Almaty qalasy ákimdigi men partııanyń Almaty qalalyq fılıaly tarapynan Túrkistan oblysynda zardap shekken azamattarǵa 70 tonnadan astam gýmanıtarlyq kómek, sonyń ishinde kıim, tósek oryndar, asa qajet azyq-túlik, gıgıenalyq quraldar, un sııaqty birinshi kezekte kerekti zattar jiberildi.
Sonymen qatar Jas Otan eriktileri evakýasııalaý pýnktteri men azyq-túlik, kıim, tósek oryndary, gıgıenalyq quraldaryn taratý jumystaryna qatysady.
Karantındegi Almaty búgingi qıyndyqtarǵa qaramastan, Nur Otan partııasynyń bastamasyna jedel ún qatyp, ońtústik halqyna kómek berýge umtylyp otyr. Qaıyrymdyq qyzmet ashyqtyqty, aıqyndyqty pen esep berýdi talap etetindikten, kómek kórsetken azamattar men mekemelerdiń tizimi daıyndaldy, atap aıtsaq «Jańa Alataý» qory, «Metall Prom», «Kazlegprom-Almaty» jaýapkershiligi shekteýli seriktestikteri, «Eır Astana» Aksıonerlik qoǵamy, kásipker, partııa múshesi Muhtar Zýleev, qalalyq máslıhat depýtaty Erbolat Qasymov jáne taǵy basqalar bar.