Kenshiler astanasyndaǵy kópqabatty úıdiń tutas bir qabyrǵasyna qyzmet babynda qaza tapqan qoryqshy Erlan Nurǵalıevtiń kıiktiń laǵyn kóterip turǵan áıgili sýreti salynyp jatyr.
Jumysty uıymdastyrýshylardyń biri, «Belsendi azamat» jobasynyń jetekshisi Sabır Nııazov sýretti salý ıdeıasynyń byltyr paıda bolǵanyn aıtady.
– Bul – qalalarǵa tán zamanaýı óner. Kórkemsýrettegi janrdyń mundaı túrin mýral dep ataıdy. Munyń eskızin jasaýǵa jáne demeýshi tabýǵa oblys pen qala ákimderi kómektesti, – deıdi ol.
Qaladaǵy ortalyq kóshelerdiń biri – Nurken Ábdirov dańǵylyndaǵy №4 úıdiń qasbetine qolyna aqbókenniń laǵyn ustap turǵan qoryqshynyń sýretin qylqalam sheberi Shyńǵys Qasymov salyp jatyr. Sýretshi jumysty eki aptanyń ishinde aıaqtaıtynyn aıtady.
Mýral tolyq bitken soń, onyń astyńǵy jaǵyna Erlan Nurǵalıevtiń ómirbaıany men qyzmeti jáne erlik isi týraly qysqasha aqparat jazylǵan taqtaısha qaǵylady.
Jobany uıymdastyrýshylardyń aıtýynsha, oblys ortalyǵynda aldaǵy ýaqytta batyr ushqysh Nurken Ábdirovtiń beınesi keskindelgen taǵy bir mýral salynbaqshy.
«Osylaısha bul jumys aǵartýshylyq, ólketanýshylyq qyzmetterin de atqarady», deıdi jarqyn ıdeıa, jaqsy istiń jýan ishinde júrgen «Belsendi azamat» jobasynyń jetekshisi.
Eske salsaq, qoryqshy Erlan Nurǵalıev aqbókenderdi qorǵaý jolynda brakonerlerdiń qolynan byltyr qaza tapqan bolatyn.