Elorda ártisteri, vokalıster, belgili mádenıet qaıratkerleri, shyǵarmashylyq ujym basshylary Uly Otan soǵysynyń barlyq ardagerlerin quttyqtady. Bul týraly qala ákimdiginiń resmı saıty habarlady.
Alǵash bolyp ardagerlerdi belgili opera ánshisi Maıra Muhamedqyzy quttyqtady.
«Barlyǵyńyzdy 9 mamyr – Jeńis kúnimen shyn júrekten quttyqtaımyz. Bul jeńisti qany men terin tógip, erlikpen alyp bergen bizdiń atalarymyz, ákelerimiz, UOS ardagerleri. Biz sizderdiń eńbekterińizdi eshqashan umytpaımyz», – degen opera ánshisi Uly Jeńis úshin barlyq ardagerlerge alǵys aıtty.
Sondaı-aq ardagerlerdi astanalyq «Jastar» teatrynyń tanymal akteri Ádil Ahmetov merekemen quttyqtady. О́ziniń beınejoldaýynda jas akter Uly Otan soǵysyndaǵy Jeńistiń 70 jyldyǵyna arnalǵan «Anaǵa aparar jol» fılminde basty róldi somdap, soǵys dámin sezgenin aıtady.
Qazaqstandyq teatr jáne kıno aktrısasy Altynaı Nógerbek óziniń ardagerlerge arnaǵan quttyqtaýynda 9 mamyr ol úshin otbasynyń úlken merekesi ekenin atap ótti. Ol óz atasy men naǵashy atasy sol qatygez soǵysqa qatysyp, baqytyna oraı ekeýi de aman oralǵanyn aıtty.
Uly Otan soǵysyna 1 200 000 qazaqstandyq attanyp, olardyń jartysy maıdannan oralmaǵan. 700 myńnan astam qazaqstandyq soǵysqa qatysýshy eńbek armııasy men arnaıy qurylys bólimderine jazyldy. Búgingi tańda elordada 44 UOS ardageri turady.
Aıta keteıik, Uly Otan soǵysyndaǵy jeńistiń 75 jyldyǵyna oraı Nur-Sultanda 3 688 adam birjolǵy aqshalaı tólem aldy. Onyń jalpy sýmmasy 180 mln teńgeni quraıdy. 44 soǵys ardageri men múgedekterine 1 mln teńgeden tólendi.