Nur Otan partııasy sý tasqynynan zardap shekken Maqtaaral aýdanyna 400 tonnadan astam gýmanıtarlyq kómek jibergen. Al «Jas Otan» volonterlary men belsendileri jergilikti jerde jetkizilgen kómekti turǵyndarǵa úlestirip berýmen aınalysyp jatyr. Bul týraly Nur Otan partııasy Tóraǵasynyń birinshi orynbasary Baýyrjan Baıbek Facebook paraqshasynda jazdy.
«Qurmetti dostar! О́zderińizge belgili, el Prezıdenti Qasym-Jomart Toqaevtyń tapsyrmasy boıynsha Túrkistan oblysy Maqtaaral aýdanynyń sý basýdan zardap shekkken turǵyndary tolyqtaı jańa nemese jóndelgen turǵyn úımen qamtamasyz etiledi. Árbir adam respýblıkalyq bıýdjetten 100 myń teńgeden alady. Memleket basshysynyń bastamasymen qolǵa alynǵan áleýmettik qoldaý sharalaryna qosymsha Elbasynyń tapsyrmasy boıynsha «Nur Otan» partııasy maqtaaraldyqtarǵa 400 tonnadan astam gýmanıtarlyq kómek, onyń ishinde azyq-túlik, jeke gıgıenalyq quraldar, kıim-keshek, tósek-oryn jabdyǵy jáne taǵy da basqa zattar jóneltti», - dep jazdy Baýyrjan Baıbek.
Onyń aıtýynsha, «Jas Otan» volonterlary men belsendileri jergilikti jerde jetkizilgen kómekti turǵyndarǵa úlestirip berýmen aınalysyp jatyr.
«О́ńirlerdegi partııalastarymyz ben belsendilerimizge jurtshylyqqa jedel qoldaý kórsetýdi uıymdastyrǵandary úshin alǵys aıtamyn. Ásirese, partııamyzdyń jastar qanatynyń jumysyn erekshe atap ótkim keledi. Birlik, yntymaq jáne ózara kómek qolyn sozý sekildi qasıetter tap osyndaı qıyn-qystaý sátterde kórinedi» - dep jazdy ol.
Sondaı-aq ol jalpy, Nursultan Nazarbaevtyń bastamasy boıynsha «Nur Otan» partııasy men «Birgemiz» qory qazaqstandyqtarǵa ataýly kómek kórsetýdi jalǵastyryp jatqanyn tilge tıek etti.
«Búgingi kúnge deıin 150 myńnan astam otbasy azyq-túlik sebeti men antıseptıkalyq quraldar aldy. Buǵan qosa 100 myń otbasy tegin maskamen qamtamasyz etildi. 360 myń otbasy 50 myń teńgeden birjolǵy tólemmen qamtyldy. Otbasy múshelerin qosa eseptegende, bul shamamen 1 mln qazaqstandyqty quraıdy» delingen jazbada.