Maqalanyń taqyryby aıtyp turǵandaı, qazaqta dál osyndaı maqal bar. Bunyń arǵy túbi quran-hadısten alynǵan sııaqty. О́ıtkeni Quranda «Árkim qoleki istegen kúnásine saı zardabyn tartady» deıtin maǵynada ashyq aıat bar. Osy oraıda bizdiń aıtpaǵymyz: ertede taýly-qyrqaly, sýly-nýly, orman-toǵaıly óńirde bir taıpa meken etipti. El bolǵan soń baıy men kedeıi, jaqsysy men jamany, bilimdici men nadany aralasyp ómir súripti.
Osy eldiń ishinde úılengenine kóp jyl bolmaǵan jas otbasy ómir súripti. Olardyń qolynda ábden qartaıǵan, asyraýǵa muqtaj kári ákeleri bar eken. Jasynda baǵyp-qaǵyp ósirgenine qaramaı jas jigit qart ákesine jóndi kóńil bólmeıdi. O dúnıege attanatyn ólmeli shal retinde qaraıdy. Qarııanyń qarny birde ash, birde toq, bala men kelinniń bergenin iship, bermese sabyr saqtap, bir Qudaıǵa ǵana jalbarynyp jata beredi.
Qarııanyń jatqan jeri mundaı jaısyz bolar ma. Balalary bolsa butaǵy durys arshylmaǵan tal aǵashtan jasalǵan tósek-sákige juqa tósenish tastap, soǵan jatqyzyp qoıady. Qarııanyń qarsylasýǵa qaýqary joq, aǵash tósekte jambasy tesilip, kózi botalap jatady. Tek qana endi-endi esi kirip kele jatqan tórt jasar nemeresi atasyna kelip, mańdaıynan sıpap, saqalyn tarap qasynan shyqpaıdy.
Atasynyń aǵash batyp, jaýyr bolǵan arqasyn sıpaıdy, jarasyna maı jaǵyp kómektesedi. Atama bulaı jasamańdar dep, óziniń áke-sheshesine aıtyp kóredi. Olar ádettegideı mán bermeıdi. Sodan ábden amaly taýsylǵan nemere shaǵyn aýlanyń ishine jas shybyqtardy jınaıdy. Olardy nan jabatyn peshtiń ústine qoıyp shala keptiredi. Sodan keıin asyqpaı toqýdy bastaıdy. Tórt jasar balanyń qolynan árıne birdeme kelmesi anyq. Biraq jumysyn toqtatpaıdy. Qashan kórseńiz aýlada shybyq toqyp otyrǵany.
Sodan bir kúni balanyń áke-sheshesi: «sen osy ne istep júrsiń, myna jas shybyqtardy qaıtesiń?», dep suraıdy. Sonda bala: «Jas shybyqtardan sáki-tósek toqyp jatyrmyn», deıdi. «Ony qaıtesiń?». «Sizder qartaıǵanda sonda jatqyzamyn», deıdi. Sonda baryp áke-sheshesi esin jıǵan eken. Sol sátten bastap ákesi qarııany jumsaq tósekke jatqyzyp, kútip baǵypty.